Пишува: Александра Тимковска/aleksandra@panacea.mk
Оваа 2018 година е јубилејна година за Институтот за белодробни заболувања кај децата Козле, како е да се раководи со еден ваков институт и што тој претставува за здравјето на децата и воопшто за сите деца во Република Македонија?
Д-р Андоновски: Навистина 65 години претставуваат нешто големо и значајно како за оваа установа така и за сите кои ја граделе, подигале, унапредувале и работеле за да таа е денес што е. Ден-денеска тој тимски дух и позитивната работна атмосфера го одбележува работењето на овој Институт, на оваа значајна институција која е, пред се, со посебен примат за сите дечиња на РМ. Раководењето воопшто не е лесно во смисла на контролирање и управување како со човековите ресурси така и со се што е потребно да поседува оваа институција внатре во себе од технички и медицински апсект. Знаеме што наследивме, но тоа е веќе минато, а иднината ни претстои и веќе ја гледаме, гледаме како една визија полека, но сигурно преминува во стварност.
Очекувам капацитетот на Институтот да биде проширен во претстојниот период и да се зголеми бројот на леглата, а со тоа и да може да се излезе во пресрет на напливот на пациентите кој преку есенскиот и зимскиот период е во огромни размери, вели д-р Андоновски
На раководна позиција сте од минатата година, па во која насока се движат Вашите планови кога е Институтот во прашање?
Д-р Андоновски: Она што е најбитното нешто е дека ако се сака се се може. Најмалку сакам да говорам за минатото, но да не е минатото нема ни да имаме иднина. Учиме на грешките и не сакаме да ги повторуваме. Институтот треба да е на највисоко ниво, како работно така и научно. Се што е потребно го обезбедуваме етапа по етапа, за почит е и треба да се напомене фактот дека со помош на донациите од многу амбасади и компании, здруженија и добротвори, со особено залагање на менаџерскиот тим оваа институција се здобива со неопходните помагала со кои треба да работи и да биде во тек со модерните техники. Вистинската иднина на оваа институција е да премине во прва државна детска болница. Болница која ќе ги прошири своите дејности и ќе биде сервис на граѓаните на РМ т.е. на нашите мали херои, а тоа се децата. Досега го средивме и унапредивме системот на работење, воведовме и трета смена лабораторија, постојана и континуирана медицинска едукација, обезбедени се врвни нови медицински апарати кои ни служат во унапредување на дијагностиката. Со техничките проблеми настанати од градењето се уште се бориме, но и тоа ќе биде надминато во претстојниов летен период. Постојано комуницираме со јавноста и транспарентно настапуваме во се, се со цел оваа институција да функционира беспрекорно.
Со колкав капацитет во моментов располага Институтот и дали истиот е доволен да се одговори на потребите?
Д-р Андоновски: Во моментов институтот располага со 91 легло за деца и 91 легло за мајки. Сите соби по одделите се опремени со сопствен тоалет, интернет врска и телевизор. Болницата во моментот е единствена во која престојот може да се компарира со некоја од приватните болници. Сопствена кујна која ги храни сите пациенти кои претстојуваат во болницата, а притоа и нашиот нутриционист работи на мени кое е мени со потребна нивелација и внос на калории зависно од заболувањето. Нормално дека очекувам капацитетот на Институтот да биде проширен во претстојниот период и да се зголеми бројот на леглата, а со тоа и да може да се излезе во пресрет на напливот на пациентите кој преку есенскиот и зимскиот период е во огромни размери. Исто така, треба да се напомене дека со тоа зголемување ќе се растовари и Детската универзитетска клиника, која како терциерна установа работи со различни патологии, а, исто така, е многу обременета со напливот на пациенти. Соработката на двете институции е на високо ниво и претставува голем подем и пример за сите институции во РМ.
Визијата на ЈЗУ Институт по белодробни заболувања кај децата Козле е да биде модел за квалитет на педијатриска нега во рамките на нашата држава и регион со примена на најсовремени дијагностички постапки и модерни тераписки протоколи. Како предводник на растечката, интегрирана мрежа за детска здравствена заштита, ќе го води развојот на иновативен, ефективен пристап за превенција, примарна здравствена заштита и специјализирани услуги, со крајна цел подобрување на здравјето на сите деца, што всушност подразбира сето ова?
Д-р Андоновски: Визија која преминува во реалност. Регионален центар кој и сега ја покрива територијата на цело Скопје, цела РМ и Косово. Треба да знаеме дека 80 % од заболувањата кај децата се од респираторна патологија, така што како институција отворено со децении ја работиме таа најсеопфатна патологија и сите пациенти се задоволни. Со модернизирањето само навестуваме дека РМ има институција од врвен карактер која навистина функционира беспрекорно. Стремежот е јасен и веќе кажан – Институтот да премине во прва детска болница која ќе помага на сите деца од цела РМ и регионот. Она што е за поздрав е воведувањето на интегрираниот информационен систем, кој ќе ни помогне и нам лекарите да го скратиме и унапредиме времето на давање на брза здравствена услуга, а со тоа и целосен опис на една историја за пациентот. Архивирањето на сите податоци и достап до истите во секое време. Имеџингот со најсовршена апаратура која ќе ни ја поедностави патеката до воспоставување правилна дијагноза и ред други нешта кои ќе бидат објавени наскоро. Визијата е двигателот кон напред и тоа набрзо ќе биде ставено во служба на народот и подобрување на нашиот здравствен систем.
Вратите на институтот се секогаш ширум отворени за сите на кои им е потребна нашата помош. Тука сме и постоиме за сите деца и нашето мото е СЕ ЗА ДЕЦАТА, вели д-р Андоновски
Мисијата на Институтот е да се обезбеди највисок квалитет на лекување и нега на пациентот, во најбезбедна можна животна средина со цел да се постигне најдобар можен исход за секој пациент, а сето ова, велите, подразбира почитување на пет столба, кои се тие и што всушност се опфаќа со нив?
Д-р Андоновски: Како модерна институција која поседува нов објект кој го опремуваме со најврвна технологија работиме и на унапредување и едукација на кадарот. Стимулираме сето тоа да биде заедно издефинирано и споено за да ја даде и мисијата на овој институт. Целите и мисијата произлегуваат од стремежот на целиот тим кој работи во оваа институција и за кои сите заеднички се залагаме. Пет столба се носачи на институтот и ни се како кодекс кој сите ние го почитуваме. Кадарот кој го поседуваме е кадар кој веќе е профилиран и на врвот на својата задача. Лекарите се со научни титули, имаме и млади специјализанти кои ќе ја продолжат и унапредат мисијата и работата на овој Институт, тие се дел од нашиот тим и даваат се од себе да се биде во најдобар можен ред. Средниот медицински кадар, исто така, е на голема тежина поради постојаниот притисок кој тие со децении го носат на своите плеќи, тој притисок е тие да се постојано со пациентите и секојдневно ја вршат совесно својата задача. За Институтот да функционира технички тука е и техничкиот персонал кој ни е од значајна помош скоро секаде. Целиот тим е постојано поддржан за континуирана едукација, нам ни е битно да ние имаме обучен и врвен кадар.
И за крај, со оглед на тоа дека од формирањето до денес Институтот доживеал низа трансформации согласно потребите и состојбите, дали е можно нешто слично да се очекува и во блиска иднина?
Д-р Андоновски: Бидејќи зборувавме за иднината, визијата и мисијата на институтот ќе напоменам дека во соработка со Владата на РМ, ресорното Министерство за здравство, Фондот за здравство, Универзитетската клиника за детски болести и сите релевантни институции веќе подолг период се прави конструкција за нешто кое веќе ги добива потребни контури и полека се дефинираат одредените потреби кои ќе бидат надоместени за Институтот за белодробни заболувања кај децата Козле да прерасне во прва детска болница од врвен ранг и со врвен квалитет на услуги. Во самиот институт веќе непречено функционираат доста практики од врвен карактер, услуги од тип на лабораторија и микробиологија, центарот за алергии, астма центарот, спирометриски испитувања, центарот за цистична фиброза, бронхоскопската сала, центарот за уво нос и грло, центар за слип ап апнеја, центарот за туберкулоза, центар за нутритивни алергии и други кои се постојано со пациенти и ја вршат извонредно својата задача. Кога се ќе сумираме и ќе можеме да ви прикажеме наскоро ќе биде запознаена целата јавност. Вратите на институтот се секогаш ширум отворени за сите на кои им е потребна нашата помош. Тука сме и постоиме за сите деца и нашето мото е СЕ ЗА ДЕЦАТА.
