Пишува: Александра Тимковска
aleksandra@panacea.mk
Во пресрет на VI Конгрес на микробиолозите на Македонија со меѓународно учество и Симпозиум со наслов ”Emerging infections”, поддржан од FEMS (Federation of European Microbiological Societies), зборувавме со проф. д-р Ана Кафтанџиева, претседател на организациониот одбор. Симпозиумот и 6 Конгрес на микробиолози на Македонија, а во организација на микробиолозите на Македонија, членови на МЛД, ќе се одржат од 30 мај до 2 јуни во Охрид, а дел од настанот ќе бидат еминентни стручњаци од земјава и странство, па преку научни дебати и интерактивни дискусии, самиот настан ќе биде одлична можност за размена на искуства, проширување на знаењата, вештините и техниките од сите области на микробиологијата и современата дијагностика, превенција и терапија на инфективните заболувања, како и можност од воспоставување на нови професионални контакти.
До одржувањето на Симпозиумот и 6 Конгрес на микробиолози на Македонија со меѓународно учество има околу месец и половина и подготовките се во полн ек, што точно се случува во моментов?
Проф. д-р Кафтанџиева: Во моментов, заедно со проф. Никола Пановски, претседател на Научниот одбор на Конгресот, ја финализираме програмата за симпозиумот поддржан од FEMS (Federation of European Microbiological Societies – Здружение на европските микробиолошки друштва). Здружението на микробиолози на Македонија е членка на FEMS од 1994 година. Ова е втор пат како FEMS помага во организација на симпозиум. Првиот пат тоа беше во 2002 година, и тој симпозиум беше дел од третиот конгрес на микробиолозите на Македонија. Во мај минатата година конкуриравме за грант во FEMS за организација на симпозиумот, кој ни беше доделен во септември 2017 година. Идејата за грантот, како и помошта за подготовка на документите за грантот, ја добивме од проф. д-р Васо Талески, од факултетот за Медицински науки ,,Гоце Делчев” во Штип, кој беше делегат на нашето здружение во FEMS, а сега ја има функцијата на директор за конференции и интернационализација на FEMS. Што се однесува до конгресот, пак, крајниот рок за поднесување на апстрактите заврши, но сè уште пристигаат апстракти. Веројатно, следната недела ќе биде познат точниот број на учесници на конгресот, како домашни, така и од странство.
Симпозиумот и Конгресот се одлична можност да се слушнат врвни предавања, дебати и интерактивни дискусии од страна на врвни стручњаци од земјава и пошироко, колку и кои сè предавачи ги очекувате?
Проф. д-р Кафтанџиева: За симпозиумот се знае точниот број на учесници, бидејќи заврши пријавувањето на учесниците уште пред две недели. Како предавачи се поканети еминентни професори од земјава и странство (Германија, Австрија, Холандија, Франција, Италија, Шпанија, Грција, Словенија, Бугарија, Србија, Турција и Израел).
Може да се каже дека нашето Здружение е едно од најактивните членови на Македонското лекарско друштво. И овој конгрес и Симпозиум очекуваме интересни и актуелни предавања, кои ќе побудат интерес и плодна дискусија и размена на мислења и искуства.
FEMS доделува стипендии за млади научници. Колку млади научници всушност се пријавени за стипендија и како таа се доделува?
Проф. д-р Кафтанџиева: Со добивање на грантот за организација на симпозиумот, имаме обврска да доделиме 40 % од грантот на предавачи, а 60 % на млади научници. За грант конкурираа околу 30 учесници. Тие доставија барање за добивање грант со апстракт и кратка биографија. Во тек на следната недела, Комисијата, која е дел од Научниот одбор, ќе ги разгледа апстрактите и биографиите на сите што конкурирале и врз основа на квалитетот на темата и на кандидатот, ќе додели грант кој опфаќа три ноќевања со полупансион во хотелскиот комплекс Метропол-Белви, котизација и дел од патните трошоци.
Кои области од микробиологијата се опфатени и накој начин истите ќе им бидат презентирани на присутните, односно како е замислен текот на самиот настан, презентацијата?
Проф. д-р Кафтанџиева: Сите области од микробиологија се опфатени преку предавањата и постерите на учесниците, и на симпозиумот и на конгресот. И постерите ќе бидат Е-постери (електронски постери) во вид на куси презентации (5 минути) пред публика на видеобим во две сали. И овој тип на презентација е интересен и обично во дискусиите пред постерите се вклучуваат голем дел од учесниците.
За крај, со оглед на тоа дека ова веќе ви е 6 конгрес, колку и на кој начин организирањето на овие настани досега се покажало како корисно за сите оние кои се дел или инволвирани во областа на микробиологијата или медицината воопшто?
Проф. д-р Кафтанџиева: Досега Здружението на микробиолози на Македонија и Институтот за микробиологија и паразитологија, Медицински факултет, УКИМ Скопје, организирало 5 конгреси со меѓународно учество, еден симпозиум поддржан од FEMS, Балкански конгрес на микробиолози. Секоја година се одржуваат по 3-4 секциски состаноци и симпозиуми на кои учествуваат предавачи од земјава и од странство. Може да се каже дека нашето Здружение е едно од најактивните членови на Македонското лекарско друштво. И овој конгрес и Симпозиум очекуваме интересни и актуелни предавања, кои ќе побудат интерес и плодна дискусија и размена на мислења и искуства.
