Пишува: Александра Тимковска/aleksandra@panacea.mk
36. Конгрес на Интернационалното здружение за прочистување на крвта е закажан од 6 до 8 септември во МАНУ, на 8 и 9, пак, ќе следуваат Курсевите за КМЕ на ЕРА-ЕДТА (Association of European kidney specialists/Асоцијација на Европски нефролози и ISN (The International Society of Nephrology) Интернационално здружение за нефрологија. Она што е важно да се потенцира во пресрет на одржувањето на Конгресот, открива проф. д-р Спасовски, е дека учесниците ќе добијат европски – УЕМС (Union of European Medical Specialists) акредитирани бодови за учество, во земјава препознаени со еквивалентност.
Најавено е дека всушност овој Конгрес ќе биде прв во земјава од областа на нефрологијата, а кој ќе го носи предзнакот светски, со оглед на тоа дека покани се испратени до повеќе светски признати научници. Дали можеби во моментов знаете колку точно говорници од светот ќе допатуваат во земјава и од каде се ќе бидат тие?
Проф. д-р Спасовски: Засега имаме 24 светски еминентни предавачи од Кина, Индија, Јапонија, САД, Велика Британија, Белгија, Италија, Полска, Русија, Чешка, Турција, Словенија, Хрватска, Србија, Бугарија, Албанија…
Конгресот освен за нас е исклучително интересен и за регионот, од причина што во склоп на програмата ќе можат да се видат сите светски достигнувања и најсовремените методи кои се користат во оваа област на медицината, што се, односно кои се теми ќе бидат опфатени?
Проф. д-р Спасовски: Освен дијализата која е најстандардна процедура што регуларно се изведува во земјите од регионот, со сите модалитети и техники, новите дијагностички процедури и можностите за забавување на прогресијата на бубрежната инсуфициенција, ќе се зборува и за техники за прочистување на крвта од соодветни токсини или имунолошки штетни материи во преддијализниот период. Потоа кога да се започне со потребната ренална заместителна терапија, како и која техника на прочистување да се избере за соодветен пациент и неговата медицинска состојба, техниките за прочистување и кај пациенти со зголемено ниво на масти, како и во онконефрологијата, за посебните специфични мерки при лекување на атипичен хемолитичко-уремичен синдром, што со потребата од прочистување при состојби на бременост и трансплантација на бубрег со соодветни медицински компликации. И на крај, ќе се зборува за сите придружни проблеми кај пациентите кои се лекувани со овие техники и можните долгорочни компликации.
До одржувањето на Конгресот има уште полни два месеци, како течат подготовките, односно што точно се случува и работи периодов во однос на организацијата на самиот настан?
Проф. д-р Спасовски: Местото на одржување е МАНУ, технички услови за светски конгрес имаме, како и модерна техника за успешна презентација иако за севкупната организација се потребни средства за да можеме да се покажеме во најдобро организациско светло. За жал, Македонија нема многу светски компании кои се асоцирани со темите на Конгресот, но сепак неколкуте постоечки ја препознаваат потребата и моментот за поддршка и истата веруваме дека нема да изостане.
Она што е важно да се потенцира во пресрет на одржувањето на Конгресот, открива проф. д-р Спасовски, е дека учесниците ќе добијат европски – УЕМС (Union of European Medical Specialists) акредитирани бодови за учество, во земјава препознаени со еквивалентност.
Генерално во светот има многу медицински настани, а со рестрикциите во буџетите на секоја земја за лековите и медициските помагала, како и најновите перцепции за конфликти на интерес за интеракцијата лекар – компанија, просторот за поддршка за учество на колегите на соодветни настани е многу стеснет. Понатаму, Македонија не е најлесно пристапна земја за авиосообраќај, така што ние би сакале со промотивно регистрациско учество да го поттикнеме интересот за учество кај колегите во околните земји, иако има интерес и досега се добиени педесетина апстракти и на учесници од сите земји од коишто имаме и предавачи.
Понатаму, се финализира и програмата, се договараат интересни мини како и ’lunch’ симпозиуми. Се организираме за логистика за хотелско сместување и трансфери, најоптимални опции за летови итн.
За крај, иако можеби е рано и неблагодарно да се предвидува, но што сметате дека ќе биде најсветлата точка на конгресот?
Проф. д-р Спасовски: Претпоставката дека ќе бидеме запознаени со можностите за регенерација или, пак, продуцирање на артефициелен бубрег, или, пак, пренослив бубрег.
