Интервју со ас. д-р Андријана Ѓорѓеска: Блефаропластика –хирургија на очните капаци

Блефаропластиката како хируршка процедура со која се коригираат несаканите последици од процесот на стареење во пределот на очните капаци

                                                      Пишува Сања Наумовска/sanja@panacea.mk

Естетската хирургија претставува тренд кај нас и во светот за разубавување и подмладување на изгледот. Постојат повеќе процедури за подмладување на лицевата регија, а блефаропластиката е една од нив. Претставува хируршка интервенција на очните капаци со која се отстранува вишокот кожа (и доколку е потребно и другите структури), а резултатот е враќање на освежен и подмладен изглед на лицето.

За постапката и предностите на блефаропластиката разговараме со ас. д-р Андријана Ѓорѓеска, специјалист по општа хирургија, субспецијалист по пластична и реконструктивна хирургија на Клиниката за пластична и реконструктивна хирургија.


Каква процедура е блефаропластиката?

Д-р Ѓорѓеска: Блефаропластиката е хируршка процедура со која се коригираат несаканите последици од процесот на стареење во пределот на очните капаци. Таа може да се изведува во пределот на горните и долните очни капаци. Во последно време оваа процедура е една од најчестите естетски корекции поради едноставноста на изведувањето, ефикасноста на процедурата и брзото опоравување на пациентите. Пациентите кои ја бараат оваа процедура се најчесто над 45 годишна возраст и повеќето се жени, но во последните години сѐ повеќе има и мажи. Освен како естетска процедура, понекогаш се прави и заради корекција на некој функционален недостаток.

Во кои случаи се изведува оваа хируршка процедура?

Д-р Ѓорѓеска: Неминовно, процесот на стареење никој не може да го избегне. Тој е условен од генетиката, конституцијата, стилот на живот и животните навики и овој процес кај секоја индивидуа се манифестира на различен начин и во различен период од животот. Првите знаци на стареењето обично се гледаат на лицето, бидејќи тоа е првото нешто што ни остава впечаток кога ќе погледнеме во еден човек.

Процесот на стареење во пределот на очите се манифестира најбрзо, а првите бори, од грима, од мимика или од смеење, се јавуваат веќе после триесеттата година од животот. Во текот на стареењето се опушта еластицитетот на кожата, се губи нејзиниот тонус, а мускулатурата слабее.

Како последица на тоа, во пределот на горниот очен капак се  јавува вишок кожа, а во пределот на долниот капак борите се продлабочуваат. Масните перничиња присутни во горниот и долниот капак, поради слабост на мускулот постепено стануваат забалежливи под кожата. Сето тоа резултира со тажен и изморен изглед на лицето и токму тука е местото на блефаропластиката за коригирање на есететскиот проблем и подлмладување на лицето. Блефаропластиката, понекогаш се користи и за корекција на функционални недостатоци. Еден таков пример е кога вишокот на кожа на горниот капак, претставува проблем во видното поле. Сепак, треба да се потенцира дека оваа процедура, кај нас во најголем број од случаите се прави од естетски причини.

Блефаропластиката, понекогаш се користи и за корекција на функционални недостатоци. Еден таков пример е кога вишокот на кожа на горниот капак, претставува проблем во видното поле.

Колку често се изведува блефаропластиката?

Д-р Ѓорѓеска: Во последните години се изведува многу почесто отколку порано. Генерално, оваа процедура е особено барана бидејќи во споредба со другите естетски корекции како ринопластиката, абдоминопластиката, корекцијата на гради, каде што е потребна општа анестезија, кај неа пациентот е или во локална или во локално -потенцирана анестезија и претставува минимално инвазивна хирургија во споредба со другите процедури. Резултатот е подмладен изглед, процесот и времето на опоравување е брзо, болницата се напушта истиот или следниот ден по интервенцијата, а пациентот после една недела се враќа на секојдневните активности.

Како се изведува блеферопластиката?

Д-р Ѓорѓеска: Блеферопластика може да се изведе во локална, локално-потенцирана и општа анестезија. Потребна е стандардна предоперативна припрема на пациентот, која подразбира крвна слика и анамнеза за предходни заболувања и податоци каква терапија прима во моментот.

Блеферопластика може да се изведе во локална, локално-потенцирана и општа анестезија

Во случај кога се отстранува само вишокот на кожа интервенцијата се изведува во локална анестезија. Најновите трендови ни укажуваат на ремоделирање и редистрибуирање на масните перничиња на друга позиција и во тој случај интервенцијата се изведува во локално- потенцирана анестезија. Локално -потенцирана анестезија се користи и во сите други случаи кога се проценува дека пациентот на тој начин ќе се чувствува посмирен и помалку исплашен од интервенцијата.

Колку време трае заздравувањето од интервенцијата?

Д-р Ѓорѓеска: Веднаш по операцијата пациентите би требало да чуваат ладни облоги на очите за да се превенираат хематоми и отоци. Пациентот ја напушта болницата истиот или следниот ден од интервенцијата, конциите се вадат помеѓу петтиот и седмиот ден, а вообичаено после една недела може нормално да се извршуваат работните обврски. Вообичаено, лузните во предлеот на очните капаци се со многу добар естетски изглед но, сепак, се препорачува нега со масни креми и препарати за третман на лузни.