Пишува: Сања Наумовска/sanja@panacea.mk
Полипите во носот се една од причините кои доведуваат до пореметување на нормалното дишење, т.е. дишењето на нос. Носната полипоза или позната кај народот како „диво месо“ во носот е често заболување, кое се претпоставува дека се јавува кај еден до четири отсто од населението, со тенденција на пораст. Најчести причинители на носната полипоза се инфекции, алергии, астма, преосетливост на лекови или имунолошки заболувања.
За дијагностицирањето и лекувањето на носната полипоза, разговараме со д-р Николица Цекиќ, специјалист оториноларинголог
Што е носна полипоза и каде најчесто се појавуваат полипите?
Д-р Цекиќ: Полипите во носот преставуваат бенигни творби кои се продукт на оток (едем) на носната лигавица. Мора да напоменеме дека не се причина, туку последица на одредени промени на носната лигавица.
Полипите преставуваат безболни формации, кои се меки и глатки со сјајна површина. Според формата можат да бидат округли или во форма на крушка или пак сплоснати, со сива или розеникава боја.
Полипите се со пихтиеста конзистенција, еднострани или двострани.Тие се мобилни (подвижни) и не крварат.
Предилекциони места или места на најчесто појавување на полипите во носот се устиата (отворите) на синусните шуплини, на лигавицата на средната носна школка ,во ситастите ќелии (поради постоење на низок ткивен притисок), на дупликатурата на лигавицата на виличниот синус и др.
Кои се причините за настанување на полипите во носот и со какви симптоми најчесто се манифестираат?
Д-р Цекиќ: Носната полипоза има доста познати, но и непознати причинители. Најчести причини за појава на полипите во носот секако се хроничните воспаленија на носната лигавица, алергиите, метаболни заболувања, автономни дисфункции, преосетливост на лекови и друго.
Најчесто, кога пациентот се соочува со носна полипоза има потешкотии со дишењето на нос, кое може да оди до целосно запушување на носот, како и секреција од носот од различен тип и слевање на секрет во грлото. Полипите во носот предизвикуваат и пореметување, па дури и целосно губење на осетот за мирис. Карактеристичен симптом е и главоболката, како и болките во пределот на лицето или челото, деформации на носот и друго.
Дали сите промени во носот преставуваат полипи?
Д-р Цекиќ: Апсолутно не! Секогаш треба да имаме предвид дека освен полипи, во носот може да се јават и други туморозни промени како менинго-енцефалокели, папиломи, карциноми саркоми, ангиофиброми и други. Дел од овие заболувања се проследени со своја симптоматологија, но секако за поставување на точна дијагноза треба да се направат додатни иследувања.
За да се дојде до точна дијагноза важно е добро и квалитетно да се земат податоци за почетокот и текот на болеста, а оториноларинголошкиот преглед да е поткрепен со ендоскопски преглед на носната шуплина што ќе ни овозможи прецизно и точно да биде поставена дијагнозата.
Како се лекува носната полипоза?
Д-р Цекиќ: Пред почетокот на било кој третман, најдобро е доколку е возможно да се одреди причинителот за појавата на полипите во носот и по можност да се отстрани. Инаку, генерално конзервативната терапија на носната полипоза опфаќа антибиотици, по можност према антибиограм, елиминациона диета, десензибилизација, лекови за намалување на отокот на лигавицата, антихистаминици, кортикостероиди и друго.
Кога медикаментозниот третман не дава резултати, се препорачува хируршко отсранување на полипите. Најчесто се изведуваат ендоскопски функционални операции на носот и синусите, а во зависност од возраста, полот како и психо-физичката состојба на пациентот интервенцијата може да се изведе во локална, локално потенцирана и целосна ендотрахеална анестезија.
Дали полипите може повторно да се јават и покрај извршената хируршка интервенција?
Д-р Цекиќ: За жал можно е, но не кај сите пациенти. Тоа многу зависи од пронаоѓањето и отстранувањето на причинителот кој довел до таа состојба. Заради тоа многу е важно да се прават редовни контроли во постоперативниот период и дисциплинирано користење на терапија ако за тоа има потреба.
