Пишува: Сања Наумовска/sanja@panacea.mk
Еректилна дисфункција е неможност да се постигне и одржи ерекција. Повеќе од 150 милиони мажи во светот страдаат од пореметување на ерекцијата, но само 10 отсто од нив се охрабруваат да прозборат и да побараат помош за својот проблем. Повеќето мажи не сакаат да признаат дека имаат сексуални проблеми, иако современата медицина успешно ги решава.
За дијагностицирањето и начините на лекување на еректилната дисфункција разговараме со д-р Симеон Рангелов, хирург-уролог, андролог од Софија-Бугарија
Што е и како се дијагностицира еректилната дисфункција?
Д-р Рангелов: Повеќе од 150 милиони мажи во светот страдаат од пореметување на ерекцијата, но само десет отсто од нив се осмелуваат да прозборат и да побараат помош за својот проблем. Повеќето мажи не сакаат да признаат дека имаат сексуални проблеми, иако современата медицина успешно ги решава. Најчесто мажите се жалат дека eрекциите им се премногу меки или премногу кратки за да можат да остварат сексуален однос, а како симптом се јавува и неспособноста воопшто да се постигне или да се одржи ерекција.
Дијагностицирањето на еректилната дисфункција е многу важно, собено за младите пациенти. Тоа е комплексна постапка, а првите сознанија се симптомите кои укажуваат на еректилна дисфункција што ни ги предочува пациентот, кој кај урологот се пожалил на неможноста да оствари полов контакт. Со стареењето на мажот започнува и андропаузата, која во последните години започнува од сѐ порана возраст. Во дијагностицирањето на еректилната дисфункција исклучително е важно следењето андролошкиот статус и на андропаузата. Покрај тоа, за правилно дијагностицирње и понатаму, за правилно лечење на овие пациенти, потребно е и следење на сите воспалителни процеси или болести, потребни се комплексни прегледи на очното дно, на кардијалниот статус, како и целосно на васкуларниот систем.
Кои се најчестите причини за еректилна дисфункција?
Д-р Рангелов: Еректилната дисфункција може да се јави во секој период од животот на мажите. Секоја возрасна група мажи има свои причини и симптоми на еректилната дисфукција. На пример, кај најмладите кои се неискусни во половите контакти, неможноста да се оствари полов однос се поврзува со психичката состојба, поточно стравот и стресот. Групата мажи во триесеттите години, кои се во најактивниот период на полова зрелост, на пример, пак, се плашат од опасностите од добивање полови болести. Повозрасната група мажи, пак, се соочуваат со некои покомплексни проблеми врзани со нивното физичко здравје. На пример, со бенингната простатна хиперплазија или други промени врзани со возраста.
Интензивниот начин на живот предизвикува и разни емотивни и психички предизвици за мажите, кои исто така можат да бидат причини за неможност за стапување во полов контакт.
Има ли превенција или ризик фактори и како се лекува?
Д-р Рангелов: Превенцијата од еректилна дисфункција значи повремено посетување на лекарите андролози, со кои мажите треба отворено да разговараат за своите проблеми без да се срамат од својата состојба.
Лекувањето на еректилната дисфункција бара големо трпение и од страна на лекарот и од пациентот и голема заемна доверба. Најтешките форми на еректилна дисфункција бараат оперативно лекување. Но, во практиката речиси и да нема случај на еректилна дисфункција на кој не можеме да му помогнеме.
Секако, доколку се соочува со ваков проблем, би помогнало доколку мажот престане да пуши, редовно вежба и ја одржува телесната тежина, не консумира често алкохол и избегнува употреба на топли купки и сауни. Понекогаш еректилната дисфункција има врска со хроничните болести, особено со дијабетесот. Исто така и кардиоваскуларните заболувања, атеросклероза, бубрежни заболувања и мултиплекс склерозата може да доведат до импотенција.
Споменавте дека промените на очното дно може да укажат на еректилна дисфункција. Како се поврзани?
Д-р Рангелов: Почетните промени на капиларите во очното дно може да ни укаже на прогресивно нарушување на капиларите на целиот организам. Знаеме дека половиот орган е изграден од систем на крвни садови, па од тука можеме да заклучиме дека доколку има промени капиларите во очното дно следуваат и се очекуваат промени на половиот орган.
