ПИШУВА:
Катерина Шекеровска – Димовска
„Секој има големи очекувања кога се работи за нешто вака големо, но интересот е голем, поканети се многу земји да земат учество активно или пасивно, со што се надевам дека конгресот навистина ќе биде успешен. Се надевам дека ќе има и новини кои во Македонија се уште не се пристигнати, а веќе имаат искуство од другите земји“, вели Јасмина Коруноска, дипломирана медицинска сестра (ЈЗУ Универзитетска клиника за неврологија) и претседател на Организацискиот одбор на I Конгрес на невролошката секција на медицински сестри и техничари при ЗМСТАМ. Првиот меѓународен конгрес на невролошката секција на медицински сестри и техничари при ЗМСТАМ ќе се одржи од 8-11 јуни во хотел „Дрим“, Струга, заедно со Третиот симпозиум на Македонското невролошко здружение, под наслов „Новитети во третманот и негата на невролошките пациенти“.
Сестра Јасмина, во тек се подготовките за Првиот меѓународен конгрес на невролошката секција на медицински сестри и техничари при ЗМСТАМ, кој ќе се одржи од 8-11 јуни во хотел „Дрим“, Струга, заедно со Третиот симпозиум на Македонското невролошко здружение, под наслов „Новитети во третманот и негата на невролошките пациенти“. Колку долго тлееше идејата за организација на еден ваков настан, конгрес посветен на медицинските сестри кои работат на полето на неврологијата?
Дипл. мед. сестра Коруноска: Ние медицинските сестри посетуваме едукативни настани од типот на симпозиуми, конгреси секаде низ балканските земји па и пошироко, како на сестринските така и на докторските настани… И конечно идејата така настана за и кај нас во Македонија да направиме конгрес. Идејата постоеше уште пред три години да биде одржан овој настан, но поради пандемијата со ковидот се пролонгира, но еве конечно дојде и тој ден.
Каква е програмата и која е главната тема на Првиот конгрес на невролошките медицински сестри?
Дипл. мед. сестра Коруноска: Во програмата ќе бидат опфатени сите болести во неврологијата во вид на усни презентации, постери и работилници, односно третманот и здравствената нега на невролошките пациенти, но поканети се и останатите здравствени работници и соработници кои се тесно поврзани со неврологијата, како неврохируршките, инфективните, нефрологија, гинекологија, лабораториите, радиолошките технолози, физикалната терапија и др. (нека ми извинат останатите кои не ги спомнав).
Во здравствениот систем секој има свои работни задачи, па така и невролошките сестри. Неврологијата е голема гранка и со многу болести кои произлегуваат од истата. Грижата и негата, навременото и правилно аплицирање на терапијата е основната задача кај пациентите со мозочен удар, пациентите со паркинсоновата болест, мултипна склероза, епилепсија, мијастенија гравис, полирадикулонеуритите, пациентите со ретките болести и сите други
Какви се Вашите очекувања и воопшто каков е интересот за настанот?
Дипл. мед. сестра Коруноска: Секој има големи очекувања кога се работи за нешто вака големо, но интересот е голем, поканети се многу земји да земат учество активно или пасивно, со што се надевам дека конгресот навистина ќе биде успешен. Се надевам дека ќе има и новини кои се уште не се пристигнати во Македонија, а веќе имаат искуство од другите земји.
Која е улогата и задачата на невролошките сестри, односно кои болести и состојби спаѓаат во доменот на вашите обврски?
Дипл. мед. сестра Коруноска: Во здравствениот систем секој има свои работни задачи, па така и невролошките сестри. Неврологијата е голема гранка и со многу болести кои произлегуваат од истата. Грижата и негата, навременото и правилно аплицирање на терапијата е основната задача кај пациентите со мозочен удар, пациентите со паркинсоновата болест, мултипна склероза, епилепсија, мијастенија гравис, полирадикулонеуритите, пациентите со ретките болести и сите други.
Во работниот век гледаш секакви случаи, но најубавото нешто е кога лекувањето на пациентот е завршено и среќен заминува дома заедно со своето семејство. А најдоброто од се е кога ќе ти се заблагодари и ќе ти рече: „Да не бевте вие кој знае каде ќе завршев“
Имате специфична професија, динамична и стресна работа, деноноќие исполнето со големи предизвици и неизвесност… Сестрите честопати се првите лица кои пациентите ги гледаат кога ќе се разбудат, првата подадена рака и поддршка во тешки моменти. Како успевате да останете јаки и професионални, да му помогнете на секој еден пациент?
Дипл. мед. сестра Коруноска: Уште кога си мало дете имаш своја желба што ќе бидеш кога ќе пораснеш и со самото запишување во медицинските училишта знаеш за што си се определил во животот како животна професија. Во тек на работниот век се усовршуваш, се челичиш, стануваш професионален. И покрај долгогодишното искуство се уште имаме емпатии, посебно кога за жал, крајот на лекувањето е лош и тогаш ние се уште знаеме да заплачеме, сепак, и ние сме луѓе, посебно кога се работи за млад живот.
Што е Ваша најголема сатисфакција кога станува збор за професијата?
Дипл. мед. сестра Коруноска: Во работниот век гледаш секакви случаи, но најубавото нешто е кога лекувањето на пациентот е завршено и среќен заминува дома заедно со своето семејство. А најдоброто од се е кога ќе ти се заблагодари и ќе ти рече: „Да не бевте вие кој знае каде ќе завршев“.
