Пишува:Александра Стојановска/saska@panacea.mk
Од 28 до 30 септември во Охрид, по четврти пат ќе се одржи конгрес на Македонското здружение за алергологија и клиничка имунологија, на кој освен домашни лекари, како предавачи ќе се јават и професори од странство. Според претседателот на здружението, директорот на Клиниката за пулмологија и алергологија проф. д-р Дејан Докиќ овој конгрес е специфичен по својот карактер со оглед дека ги интегрира сите супспецијалности кои се занимаваат со оваа проблематика и е посветен на новостите од областа на алергологијата и имунологијата.
Што претставува овој четврти по ред конгрес на Македонското здружение за алергологија и клиничка имунологија – МЗАКИ? Што на него како теми ќе бидат обработени, каде годинава е ставен фокуот?
Проф. д-р Докиќ: Значи, овој е четврти конгрес на Македонското здружение за алергологија и клиничка имунологија. Конгресите се одржуваат на секои четири години, но ние секогаш имаме континуитет затоа што медицината, особено алергологијата и клиничката имунологија одат напред и секоја година одржуваме новини во оваа област со цел да можеме новитетите да ги направиме што подостапни за сите лекари коишто имаат пациенти со вакви болести. Не ги оставаме лекарите да се информираат само еднаш во четири години, бидејќи тоа е предолг период за да можат да ги добијат потребните информации што има ново. Секоја година имаме симпозиуми под името „Новини во алергологјата“ и клиничката имунологија. На овој конгрес нашиот акцент ќе биде ставен на неколку теми. Пред се, на анафилаксата. Од искуство што претходно го имавме преку симпозиумите, преку кои не само што лекарите ги информираме за новитетите, туку добиваме и повратна информација што на нашите лекари им недостасува во секојдневната пракса во однос на знаење или практикување на медицината, бевме информирани дека кај нив проблемот е со третирањето на анафилактичките реакции. Се уште некои лекари не се сигурни во тоа како треба да постапат при ваквите состојби.
Поради тоа на овој конгрес обрнавме внимание на анафилактичните реакции кои може да бидат смртоносни.
Тоа е број еден и второ, се фокусиравме на пробиотиците, бидејќи тие се важен елемент во развитокот на алерголошкот дел. Пробиотиците може да извршат на некој начин одложување или намалување на појавата на алергиските манифестации кај пациенти коишто имаат таква склоност и можат да го подобрат имунитетот кај повеќе различни болести. Ќе има повеќе излагања од таа област, ќе имаме професор од Финска кој ќе дојде да говори за имунитетот и алерголошките пореметувања поврзани со пробиотиците и ќе имаме професор од Англија кој ќе говори за делувањето на пробиотиците и нивното влијание врз спречувањето или намалувањето на алергиските болести и воопшто за зајакнување на имунитетот. Секако, дека фокус ќе бидат и педијатрите кои ќе имаат две сесии. Едната ќе биде повеќе алергологија и алерголошки заболувања кај децата, а другата сесија ќе биде за имунолошките пореметувања и лекувањето на имунолошките болести кај децата. Исто така, ќе бидат опфатени и дерматолошките проблеми – кожните и офталмолошките. Ќе имаме и специјалисти од уво, нос и грло, бидејќи тука спаѓа алергискиот ринитис и други проблеми со дишните патишта, и, секако, да не ги заборавиме пулмолозите. Со нив во две сесии ќе имаме пулмолошки теми. Предвидена е и сесија во којашто ќе бидат опфатени оние пациенти кои имаат професионални алергиски заболувања или имунолошки заболувања. Значи, ќе имаме една широка плејада на слушатели, коишто се надевам дека ќе имаат што да слушнат ново во оваа област.
Ги споменавте двајцата странски професори, дали на конгресот ќе присуствуваат и други Ваши колеги од надвор?
Проф. д-р Докиќ: Секако. Ќе дојдат многу лекари од соседните земји, од Србија, Албанија, Бугарија, Турција. Ќе има од повеќе различни земји. Но, исто така, ќе има и слушатели, бидејќи се најавија повеќе групи на лекари од соседните земји. Така што мислам дека овој регион целосно ќе биде опфатен, бидејќи регионот има слични проблеми во дијагнозата и во лекувањето на болестите. Всушност имаме една заедничка историја во медицината која порано не обединувала и некои отишле понапред, некои помалку напред, но сето тоа, на некој начин, ќе биде опфатено на овој конгрес, се со цел размена на искуства и знаење меѓу колегите.
Во насока на конгресот кажете ми каква е состојбата со алергиите во Македонија? Една општа слика која покажува зошто се наметнува потребата од постојаното воведување на новини во оваа гранка од медицината.
Проф.д-р Докиќ: Алергологијата е една област која се занимава со алергиските болести. Тие се во постојан подем. Светската здравствена организација сама го прогласи 21-от век, како век во којшто алегиските болести се појавуваат во епидемиски размери. Зошто е тоа така постојат повеќе фактори, и не може да се објаснат само со генетскиот наследен фактор, туку и со околината, појавата на нови аерозагадувачи, како што се озонот, честичките на дизел горивата, азотниот диоксид и други аерозагадувачи. Секако, тука е вклучен и начинот на исхрана, односно се поголемото присуството на хербициди и пестициди во почвата и нивното манифестирање во растенијата. Исто така, тука се и хормоналната терапија, лекувањето на животните со антибиотици и нивно давање со цел да имаат подобар одговор, односно да имаат повеќе месо и сл. Сето тоа се одразува на начинот на живеење. Се разбира, дека постојат и многу други фактори кои не се уште до крај испитани. Сите тие заедно придонесуваат да алергиските болести одат нагоре во однос на новооткриени пациенти. Во Македонија се смета дека околу 25 % и повеќе од целокупното население боледува од некаква алергиска болест. Тоа значи дека ние немаме ниту една друга хронична болест којашто опфаќа толку многу население, во толкав голем број. Почнувајќи од самото раѓање, до најстарата возраст. Бидејќи алергиските манифестации можат да бидат во сите старосни групи. Така што кога ќе видите некоја болест која има толку многу голем број на пациенти, се разбира, дека таа мора да биде фокус на општеството, медицинската наука и јавното здравство, бидејќи тоа е најчестата болест со којашто ќе се среќава едно општество.
Што го прави овој конгрес интересен за лекарите?
Проф.д-р Докиќ: Како што реков, ќе биде интересен бидејќи лекарите ќе имаат можност да слушнат нови работи, особено новите области како што ги споменав пробиотиците за коишто нема материјал, нема пишан медицински материјал или нема книга, освен статии. Значи, и лекарите нема каде да се информираат за нивното влијание и придобивки. За пробиотиците и за нивната корисност се зборува многу и на овој начин сакаме сето тоа да го доближиме до лекарите. Кај нас пробиотиците вообичаено се поврзуваат само со дијареата, а во светот нивното својство е важно и кај други болести. Токму затоа, каде се тие може да се применат и што се тие прават во однос на алерголошките болести и имунолошката состојба и статус на пациентот, лекарите ќе можат сублимирано и синтитезирано да го слушнат од предавачи експерти кои ќе бидат присутни на конгресот. Сето тоа ќе биде презентирано пред нашите гости поткрпенено со најнови истражувања, студии и резултати. Да не ја заборавам и анафилаксата, која преставува многу голем проблем, во однос на тоа во таква ситуација што е она што треба да се даде, како да се реагира, се со цел да се постапи онака како што треба, а тоа е во интерес на здравјето на пациентот.
