Интервју со проф. д-р Дејан Докиќ: Лекувањето на алергиите и имунолошките нарушувања кај децата се главен фокус на третиот симпозиум на МЗАКИ

Пишува: Александра Стојановска/saska@panacea.mk

Од 20 до 22 септември во Скопје, по трет пат ќе се одржи симпозиум на Македонското здружение за алергологија и клиничка имунологија, на кој освен домашни лекари, како предавачи ќе се јават и професори од странство. Според претседателот на здружението, директорот на Клиниката за пулмологија и алергологија проф. д-р Дејан Докиќ овој симпозиум со меѓународно учество ќе ги интегрира сите супспецијалности кои се занимаваат со оваа проблематика и е посветен на новините од областа на алергологијата и имунологијата.

Што претставува овој трет симпозиум по ред на Македонското здружение за алергологија и клиничка имунологија – МЗАКИ? Што на него како теми ќе бидат обработени, каде годинава е ставен фокуsот?

Проф. д-р Докиќ: Проблемите си алергии и имунолошките нарушувања кај најмладата популација ќе бидат таргет тема на престојниот симпозиум, но секако со исто внимание ќе се зборува и за истите вакви проблеми и кај возрасната популација.

Здружението секоја година одржува симпозиуми под името „Новини во алергологијата и имунологијата“. Тоа е начин, да секогаш имаме континуитет во делот на едукацијата,  бидејќи медицината, особено алергологијата и клиничката имунологија одат напред. Од тие причини, независно од конгресите, ваквите симпозиуми се начин да новитетите ги направиме што подостапни за сите лекари коишто имаат пациенти со вакви болести. Не може да оставиме лекарите да се информираат само еднаш во четири години, како што се одржуваат конгресите, бидејќи тоа е предолг период за да можат да ги добијат потребните информации што има ново.

Што го прави овој симпозиум интересен за лекарите?

Проф.д-р Докиќ: Симпозиумот е место и прилика кадеќе се разменат мислења, искуства и идеи помеѓу македонските и интернационалните колеги кои ќе присуствуваат на овој настан. Можноста на едно место да се чуе што е ново во делот на лекувањето, но и дијагностицирањето во алергологијата и имнулогијата, сама по себе го прави овој симпозиум предизвик за лекарите. Тоа значи дека на едно место ќе бидат опфатени теми од областа на: педијатријата, алергиите на респираторниот тракт, дерматологијата, офталмологијата, пулмологијата, професионалните болести и др.

Очекуваме да учествуваат наши еминентни предавачи со пленарни предавања од глобалните теми, при што ќе се презентираат најновите достигнувања во дијагностиката и лекувањето на алерголошките и имунолошките болести.