Пишува: Александра Тимковска/aleksandra@panacea.mk
Јавноста те познава како поп пејачка, но ти имаш и своја професија, а тоа е медицината од пред извесно време си и дипломирана докторка што се случува на овој план, во која насока планираш да се развиваш на ова поле?
Симона: Точно така, медицината е моја втора љубов и професија, уште не сум се одлучила точно на која гранка од медицината ќе се посветам, но која насока и да ја одберам сакам да бидам успешна и максимално посветена на тоа што го работам бидејќи медицината е наука која навистина бара знаење, труд и посветеност.
Двете професии безусловно ги сакам, ако треба од една да се откажам тогаш би била како птица без едно крило
Како всушност се роди љубовта кон медицината?
Симона: Уште од малечка ја сакав медицината, не барав да ми купуваат Барбики, јас сакав шприцови, стетоскоп, комплети за прва помош и слично. Обожавав да ја играм улогата на докторка, мајка ми беше мој пациент и немаше ден да не ја третирам како тоа. Така што немаше посебен момент, едноставно тоа се замислував од мала го сакав и го остварив.
Штом си ја избрала медицината сигурно веќе белиот мантил е составен дел од твојот живот, но дали си подготвена доколку е потребно заради него да го оставиш микрофонот настрана?
Симона: Доста сум размислувала на оваа тема, но пак на крај ќе кажам ако се откажам тогаш би била како птица без едно крило. Двете професии безусловно ги сакам, во текот на моите студии имало моменти кои биле доста тешки, моменти кои навистина бараа жртва и цврст карактер за да стигнам до тука. Така што колку и да е тешко, сигурна сум дека ќе има решение и ќе направам се за да нема таков момент.
Музиката и медицината се две дијаметрално спротивни гранки, како успеваш да најдеш баланс меѓу нив и како успеа успешно да ги истуркаш студиите додека во исто време одлично ја градеше и музичката кариера?
Симона: Како што претходно кажав имаше доста тешки моменти, доста предрасуди, но успеав да докажам дека ако се сака се се може. Да не зборувам колку непроспиени ноќи имало, научив да функционирам со помалку часови сон, секој ден ми беше борба морам да признам, посебено кога беа испитните сесии, но доста ми помогна тоа што знаев да бидам организирана и секој момент ми беше испланиран со цели и задачи, тоа е и клучот за да постигнете се, секоја минута мора да ја си цените затоа што не се враќа.
За тебе велат најубавата докторка меѓу пејачките, но и најубавата пејачка меѓу докторките… И навистина е така, важиш за личност која многу внимава на изгледот, линијата… кои се твоите ритуали за здрав живот, како ја одржуваш кондицијата, како се негуваш себе?
Симона: Три пати неделно тренинг – најдобриот начин да се наполните со позитивна енергија, водата е неизбежен дел за добар изглед, здравата исхрана, но и моменти кога и ќе си го почестите својот организам со нешто повеќе калорично, добра серија за релаксација или книга. Тоа е тоа.
Медицината е наука која бара посветеност и сериозна работа, а ти докажа дека кога се сака се се може, но и тоа дека ако се бавиш со музиката не значи дека си личност без професија, амбиција… Како што обично и луѓето мислат дека е…
Симона: Според мене, која и професија да ја работите се бара посветеност ако сакате да сте успешни, кога станува збор за музиката тоа е нешто кое вистина бара да го сакате од срце, да сте уметничка душа, се што компонирате или изведувате да биде искрено зашто публиката тоа најмногу го чувствува.
За крај, еден совет до читателите на Panacea.mk како да го чуваат здравјето и дали навистина музиката е лек за се?
Симона: Човек кој пее зло не мисли, музиката ги оттргнува сите лоши мисли, така што може да се каже дека е добар лек. Да се грижат за своето здравје , да си постават цели и да се стремат да ги исполнат.
