Пишува: Александра Тимковска/aleksandra@panacea.mk
Една мисла на познатата американска комичарка и колумнистка Ерма Бомбек вели вака: Не ги мешајте славата со успехот. Мадона е олицетворение на првото, а Хелен Келер на ова второво. Сега сигурно се прашувате каква врска има сето ова со нашата денешна соговорничка?! Таа е славна и успешна, истовремено. Таа е жена со ангелски глас, но и стил и изглед на кој можат да и позавидат и многу помлади припаднички на понежниот пол… Гласот е нејзино ’орудие за работа’ со години, a еве што ни откри околу тоа кои се нејзините ’тајни рецепти’ со кои го негува и чува, а линијата – е и таа и е непроменета со години. Во продолжение прочитајте за што се зборувавме со маестралната Сузана Спасовска, a е поврзано со нејзината кариера, гласот, за тоа што прави кога е далеку од сцената или не е на работа во Ансамблот Танец или можеби не е ангажирана со изучувањето на кинескиот јазик…
На сцената сте долги години, но освен стилски во вашиот физички изглед речиси воопшто и да нема никакви промени, како успевате да бидете толку константна кога се во прашање килограмите и линијата и кои се вашите ритуали кога е во прашање исхраната?
Спасовска: Ги обожувам промените во музичките жанрови, а со тоа е логична и промената на стилот на облекување. Одам од крајност во крајност и тоа е интересно и возбудливо за мене и за мојата публика. Сакам да изненадувам. Во физичкиот изглед немам некои значителни промени (не пораснав ниту еден сантиметар ха, ха, ха…). После турнеја во Австралија накачувам по 3 килограми кои веднаш по доаѓањето дома ги снемува за недела до две. Како голема грешка го сметам моето прескокнување на појадокот, кафето ми е омилен пијалак воедно и појадок. Јадам еднаш во денот со многу малку леб, а пред настап, снимање аудио и видео 24 часа сум само на вода и кафе. За мене важи тоа дека и водата ме дебелее, и затоа сум, ќе речам, цел живот ГЛАДНА. Многу ми е жал што некои луѓе кои не ме виделе во живо имаат замисла дека сум крупна жена, па дури и дебела. Не знаат дека камерата додава најмалку 6 кг плус, а и многу други фактори влијаат на изгледот на снимката. Затоа, кога ќе ме видат ме прашуваат како сум ослабела не знаејќи дека сум цел живот со нормална тежина според мојата висина.
Пред настап не јадам никогаш бидејќи храната ми ја оптоварува дијафрагмата и имам потешкотии во дишењето при пеењето
Постои ли некоја намирница на која не можете да и одолеете и која е вашиот „грев“?
Спасовска: Да, постои таква намирница, а тоа е чоколадото. Знам да изедам цело чоколадо додека да трепнам. Но, затоа се трудам поретко да го купувам за да немам при рака,а желбата за благо се трудам да ја згаснам со малку алва или мармалад од шипка.
Орудие за работа на пејачите е гласот, па со оглед на тоа дека музиката е ваша љубов и определба со години како го чувате гласот, постои ли таен рецепт?
Спасовска: Мојот рецепт за чување на гласот е: не консумирам газирани пијалаци, не пушам цигари, не го оптоварувам гласот со зборување на висок тон, избегнувам задимени простории, не пијам врело, а ни премногу ладно, и се што пијам е голтка по голтка.
Често меѓу пејачите кружи еден интересен совет, а гласи вака – пред настап за отворање на гласот една чашка алкохол, колку всушност има вистина во ова?
Спасовска: За загревање на гласните жици добро е да се напиете голтка домашна ракија или една мала чашка жесток алкохол. Виното и пивото ги стегаат гласните жици. Пред настап не јадам никогаш бидејќи храната ми ја оптоварува дијафрагмата и имам потешкотии во дишењето при пеењето. За мене дисциплината е многу важна како во приватниот живот, така и во мојата работа. Ужасно сум дисциплинирана, а тоа е оптоварување за мене, а и за мојата околина понекогаш.
Есента е период на вируси, настинки… дали тоа значи изолација или можеби чување и „билдање“ на имунитетот?
Спасовска: Имунитетот понекогаш знае да ми падне, меѓутоа и кога не може да се избегне вирус или настинка, јас тоа го поминувам сосема неприметно бидејќи во мојата работа она што е закажано треба да се одработи и нема оправдување, освен во екстремни случаи. Изолација не прифаќам во никој случај.
За здравјето на човекот се вели нема цена, па колку всушност водите сметка за кондицијата на вашиот организам, особено што вашата работа изискува чести патувања, кои знаат да бидат исцрпувачки, настапи во вечерните часови, многу потрошена енергија…
Спасовска: Мојот принцип на работа од секогаш бил поинаков. Не настапувам секојдневно навечер, навечер одмарам, завршувам домашни обврски или учам. Наутро одам на работа, а после работа ги завршувам другите обврски околу проекти, снимања, и воопшто мојата кариера. Патувањата, настапите, турнеите, се уште не ми се оптоварување и се уште ја имам истата енергија како и порано. Кога имам малку слободно време сакам да пешачам, така си го рестартирам умот, се раздвижувам и се полнам со енергија.
Ваша љубов во последните неколку години освен музиката е и кинескиот јазик, со оглед на тоа дека сте прилично посветени на оваа своја пасија и одлично сте запознаени со тамошната култура и начин на живеење, постои ли можеби нешто што сте го „позајмиле“ и го применувате кај себе, а се однесува на здравјето, начинот на живот и сл.?
Спасовска: Си велам кога би била со таква дисциплина за храната би имала вишок килограми. Нивниот појадок е во 6 часот наутро, во 12 е ручекот и во 18 вечерата, и е задолжително во тоа време. Тоа е добро, но за мене неприфатливо, посебно со мојот целодневен ангажман надвор од дома. Но, прифатив нешто што во текот на животот го избегнував, а сега ми е секојдневен ритуал – пиење чај. Најмногу го сакам чајот од јасмин и уживам во него. Правилно спремање и пиење чај успокојува, сталожува и ви создава мир во телото и умот. Уште една работа која ја прифатив од нив е и јадењето со стапчиња, така сум сигурна дека количински нема да изедам многу ха, ха, ха. Ова дефинитивно е мојата препорака за диета.
Секојдневен ритуал ми е пиењето чај. Најмногу го сакам чајот од јасмин и уживам во него. Правилно спремање и пиење чај успокојува, сталожува и ви создава мир во телото и умот.
И за крај, Сузана на сцената ја знаат сите, но онаа Сузана која е далеку од рефлекторите малкумина, што е она што го правите во слободното време, што е она што ве опушта?
Спасовска: Откако ќе завршам некои домашни обврски, седнувам и учам. Изучувањето на кинескиот јазик за мене е предизвик, гимнастика на умот, мир на душата и голема љубов. Секој немир, нервоза од секојдневните обврски, неправди, ги смирувам, па дури и ги заборавам со учење на нови кинески песни, зборови, знаци. Едноставно се чувствувам помлада и посреќна.
