Кај личностите кои во организмот внесуваат помалку енергија од скробните намирници како што е лебот, тестенините и компирот забележани се поголеми шанси за развој на атриска фибрилација, најчеста аритмија, востановиле стручњаците кои го проучувале дејството на внесот на јаглехидрати во организмот. Дошле до заклучок дека личностите кои патат од пореметување на срцевиот ритам или атриска фибрилација се склони на мозочен удар, како и полоша работа на срцето.
„Со оглед на потенцијалното влијание на развој на аритмии нашата студија упатува на тоа дека оваа популарна диета, односно метод на контролирање на тежината, би требало да биде препорачувана со големо внимание“, рекол доктор Ксјаодонг Зуанг, кардиолог од кинескиот универзитет Сун Јат-Сен, кој го водел истражувањето.
Студијата била сосредоточена на недостатоците кои ги носи потполното исфрлање на јаглехиратите од менито, а водена е во склоп на големото истражување со кое биле опфатени половина милион испитаници. Резултатите од студијата ќе бидат претставени на годишната меѓународна конференција на Американското кардиолошко здружение во Њу Орлеанс. Востановиле и дека ризикот од развој на аритмии бил зголемен независно од видот на маснотијата и протеините со кои е заменет внесот на јаглехидратите. Научниците претпоставуваат дека тоа се случува затоа што луѓето кои консумираат помалку јаглехидрати во исхраната внесуваат повеќе црвено месо и заситени масни киселини, кои предизвикуваат воспаление и се плодна подлога за развој на кардиоваскуларни болести.
