Црниот дроб е најголемиот внатрешен орган во телото. Бидејќи ги обработува повеќето намирници кои ги внесуваме во организмот, исклучително е важно да се обрне внимание на изборот на храна.
Постојат намирници кои ја стимулираат работата и здравјето на црниот дроб, но, за жал, има и такви кои ја нарушуваат неговата функција.
Ова се најдобрите и најлошите намирници за црниот дроб:
Овесна каша
Храната со многу влакна го стимулира здравјето на црниот дроб. Овесната каша е најдобро да се јаде за појадок, бидејќи го поттикнува слабеењето и симнувањето на масни наслаги од областа на стомакот, што е и тоа како добро за црниот дроб.
Брокула
Ако сакате здрав црн дроб, во својата чинија ставете разновиден зеленчук. Истражувањата покажуваат дека брокулата помага во превенција на замастен црн дроб. Може да се пече или да се вари на пареа, да се подготвува како салата, да се додаде во смути или да се подготви како вегетаријанско главно јадење.
Зелен чај
Овој чај е преполн со антиоксиданти кои штитат од некои облици на рак. Ако сакате да искористите повеќе од неговите предности, подготвувајте го самите.
Кафе
Истражувањата покажале дека 2 до 3 шолји кафе може да го заштитат црниот дроб од премногу алкохол или нездрави намирници кои ги внесуваме во текот на денот.
Вода
Една од најдобрите работи што можете да ги направите за вашиот црн дроб е да го изгубите вишокот на килограми, а во тоа ќе ви помогне обичната вода. Заменете ги слатките и газирани пијалаци со вода и ќе слабеете без преголем напор.
Спанаќ
Спанаќот изобилува со антиоксиданти кои го стимулираат правилното функционирање на црниот дроб. Можете да го подготвите на различни начини. Од спанаќ може да направите и вкусна салата, да го изблендирате и додадете како прилог на главното јадење или да го додадете во смути
БОРОВИНКИ – полни се со полифеноли, хранливи материи кои штитат од замастување на црниот дроб, го поттикнуваат слабеењето и го намалуваат високиот холестерол. Ако не сте обожавател на боровинки, заменете ги со храна која, исто така, содржи полифеноли, како што е темното чоколадо, маслинките или сливите.
Билки и зачини
Сакате истовремено да го заштитите и црниот дроб и срцето? Тогаш користете оригано, жалфија или рузмарин во подготовката на оброците. Овие зачини се полни со полифеноли, но, исто така, и со вкусови, кои ќе ја намалат потребата за досолување. Во подготовката на храната можете, исто така, да користите цимет, кари и ким.
Бадеми
Бадемите и другите јаткасти плодови се супер извор на витамин Е, кој е одличен во заштита од замастување на црниот дроб. Бадемите, исто така, се добри за срцето, па дефинитивно додадете ги во секојдневната исхрана.
Исфрлете ја мрсната храна
Пржените компирчиња и хамбургери никако не се сојузници на црниот дроб. Прекумерното внесување на заситени масти го отежнува правилното функционирање на црниот дроб. Со текот на времето може да се појави воспаление, а може да се појават и лузни на црниот дроб, попознати како цироза.
Внимавајте на внесот на шеќер
Премногу шеќер може да го загрози здравјето, бидејќи црниот дроб ќе претвори дел од тој шеќер во масти, што воопшто не е добро.
Бидете умерени со алкохолот
Преголемата консумација на алкохолни пијалаци е голема закана за здравјето на црниот дроб. Покрај тоа што предизвикува замастување на црниот дроб, алкохолот може да предизвика и цироза на црниот дроб. Дури и повремено консумирање алкохол може да биде штетно ако имате генетски предиспозиции за заболување на црниот дроб. Пијте најмногу еден алкохолен пијалак дневно или два (за мажи).
Намалете го внесот на сол
На нашето тело му е потребно малку сол за да функционира правилно. Истражувањата покажаа дека секој ден во телото внесуваме вишок сол и тоа без досолување на храната. Исто така, е докажано дека прекумерното внесување на натриум може да доведе до фиброза, што упатува на цироза на црниот дроб. Избегнувајте сувомеснати производи, конзервирана храна и досолување на јадењата, пишува webmd.
