Колку подоцна? Научниците велат дека ракот кај женската популација се дијагностицира просечно и две и пол години подоцна отколку кај мажите, а дијабетесот четири и пол години подоцна отколку кај машката популација. Истражувањето го спровеле научници од Универзитетот во Копенхаген, а резултатите се објавени во магазинот „Nature Communications“. За потребите на студијата биле прегледани здравствените картони на речиси седум милиони мажи и жени, корисници на данскиот здравствен систем во период од 21 година и се востановило дека кај женската популација подоцна се откриваат повеќе од 700 болести отколку кај машката.
Исклучок е остеопорозата
„Овие резултати не изненадија затоа што мажите почесто го одложуваат одењето на лекар од жените“, рекол Соерон Брунак, професор на Универзитетот во Копенхаген и додал: „Од овие податоци заклучуваме дека за тие разлики би требало да се поведе повеќе сметка. Мислам дека повеќе не можеме да се потпираме на онаа – еден модел важи за сите“.
Тој уште вели дека со колегите се уште не успеале да ги откријат причините за ваквите разлики.
„Студијата не дава сеопфатно појаснување за тоа зошто постојат ваквите разлики. Не знаеме дали некои дијагнози се предизвикани од генетиката, околината, можните предрасуди во здравствениот систем или комбинацијата на сето наведено“, рекол професорот, додавајќи дека со колегите во моментот работат токму на ова. Открил и дека следниот чекор им е соработка со колегите од Финска, со кои ќе се работи на истиот проблем.
Недостатокот на студијата што ја спровел тимот на чело со доктор Брунак е во тоа што не е спроведена со намера да се појаснат причините за разликите, а уште едно нејзино ограничување лежи во тоа што научниците ги проучувале само дијагнозите на хоспитализираните пациенти.
„Одушевена сум со оваа студија, која го потврдува сето она што го предавам на својот станфордски колегиум за разликата во физиологијата и болестите меѓу половите“, рекла Марсиа Стефаник, директорка на Одделението за женско здравје и разлики меѓу половите на Медицинскиот центар на Универзитетот Стенфорд.
„Кога мажите ќе заболат од болестите за кои повеќето здравствени работници ги сметаат за ’женски болести’ ги дијагностицираат во подоцнежните, потешки фази и обратно“, рекла Стефаник за Ројтерс. Таа инаку не учествувала во оваа студија. На пример, на жените подоцна им се дијагностицираат болести на срцето не само затоа што тие се уште во голема мера се сметаат за „машки болести“, туку и затоа што нашите дијагностички тестови се повеќе прилагодени за машкиот пол, рекла.
„Сите медицински школи и медицински факултети би требало да инсистираат на постоење биолошки условени разлики меѓу половите, како и предрасуди за половите, за здравствените работници да станат свесни за своите потсвесни предрасуди“, смета доктор Стефаник.
