Д-р Ненси Донован, геријатриски психијатар во болницата во Бостон „Brigham and Women’s Faulkner“, заедно со колегите, открија дека засилените симптоми на анксиозност се поврзуват со високо ниво на бета-амилоид или протеински фрагменти, кои се наоѓаат во нервното ткиво, а кои вообичаено се поврзуваат со развој на Алцхајмерова болест во мозокот на постарите лица со нормални когнитивни функции.
Д-р Донован тврди дека резултатите од нивното истражување укажуваат на тоа дека засилените симптоми на анксиозност можат да бидат и ран знак на Алцхајмеровата болест.
Сите видови на деменција, вклучувајќи ја и Алцхајмеровата болест, се предизвикани од изумирањето на мозочните клетки. Точните причини за Алцхајмерова болест не се целосно јасни, но научниците се уште веруваат дека во процесот клучната улога ја имаат бета-амилоидите. Затоа е интересен резултатот на споменатата нова американска студија која покажа дека анксиозноста има голема улога во зголемување на нивото на бета-амилоид кај постарите лица, објавено е во „American Journal of Psychiatry.“
Во студијата биле вклучени 270 возрасни лица на возраст од 62 до 90 години со нормални когнитивни функции. Сите тие еднаш годишно во текот на период од пет години биле подложени на томографија (PET/CT), со цел да се утврди нивото на бета-амилоид во нивниот мозок. Симптомите на анксиозност и депресија биле утврдени со помош на прашања од геријатриската скала на депресија (GDS).
Научниците на тој начин утврдиле дека возрасните лица со засилени симптоми на анксиозност во текот на периодот од пет години, исто така, имале и повисоко ниво на бета-амилоид во мозокот.
Д-р Донован додаде дека е неопходно да се извршат некои дополнителни истражувања за да се потврдат наведените претпоставки, но дека може да се влијае на анксиозноста, а со тоа и на одложување на појавата на Алцхајмерова болест.
