Колку е почеста употребата на бои за коса, тоа значи дека е поголем ризикот од развој на рак на дојка, посочува научен труд објавен во списанието „Интернешнл журнал оф кансер”. Истражувањето било спроведено од страна на Националниот институт за здравство во САД и врз база на податоците од 46 709 жени. Фокусот бил ставен на тоа како околностите и гените влијаат врз веројатноста од развој на рак на дојка.
Резултатите покажуваат дека жените кои редовно користат долготрајна боја за коса, имаат 9 % поголеми шанси да добијат рак. Се работи за фарби кои содржат состојки што го разградуваат ендокриниот систем, а некои од нив се и канцерогени. При употреба на краткотрајните бои за коса нема забележани ризици.
„Во нашето проучување јасно го гледаме ризикот од развој на рак на дојките, поврзан со употребата на трајна боја за коса, особено меѓу жените кои често ја бојадисуваат косата“, изјави д-р Александра Вајт, раководителка на истражувањето.
