Наместо официјалната проценка според која од последици од КОВИД-19 во светот досега починале 5,9 милиони лица, пореално е дека од оваа болест до денес починале 18,2 милиони, пренесува Lancet.
Тим на експерти што се занимава со следење на прекумерниот број на смртни исходи од КОВИД-19 на Универзитетот Вашингтон во Сиетл ја проучувал состојбата во 191 земја настојувајќи да го утврди “реалниот глобален број на смртни случаи“.
Научниците напоменуваат дека некои смртни исходи се последица на зараза со вирусот, а останатите биле поврзани со инфекција со коронавирусот. Тие појаснуваат дека заразата со коронавирус можела да влијае на влошување на останатите, веќе постоечки здравствени состојби, како на пример болести на срцето или белите дробови.
При пресметувањето на овие податоци, тие користеле детерминанта наречена вишок смртност и овозможува да се процени колку повеќе смртни случаи има од очекуваниот број во споредба со претходните години.
Стручњаците податоците ги собирале пребарувајќи различни владини веб-страници, Светската база на податоци за смртност, базата на податоци за смртност на луѓе и податоците на Европската статистичка служба.
Утврдиле дека стапките на вишок смртни случаи значајно варирале во зависност од земјата или регионот, но вкупната глобална стапка пресметана во рамките на студијата изнесувала 120 смртни случаи на 100.000 луѓе.
Со истражувањето е утврдена највисока стапка на смртност во земјите со пониски приходи, како земјите на Латинска Америка, источна и средна Европа, дел од Африка, но бројот на смртни исходи бил и многу висок и во некои земји со висок приход, како што се Италија и делови од Соединетите Држави.
Најголем број на смртни случаи што се поврзуваат со пандемијата имала Индија (4,1 милион), потоа САД и Русија (по 1,1 милион), Мексико (798.000), Бразил (792.000), Индонезија (736.000) и Пакистан (664.000).
“Дополнителни истражувања ќе ни помогнат да откриеме колку смртни случаи биле директно предизвикани од КОВИД-19, а колку се индиректно последица на пандемијата“, изјави водачот на студијата Хаидонг Ванг од Универзитетот во Вашингтон во Сиетл.
Научниците предвидуваат дека прекумерната смртност поврзана со пандемијата ќе се намали во иднина, благодарение на вакцините и новите начини на лекување, но предупредуваат дека пандемијата се уште не е завршена и може да се појават нови, опасни варијанти на коронавирусот.
