Студијата следела повеќе од 51.000 породувања, вклучувајќи 4.409 случаи во кои мајките имале абнормални нивоа на тироидни хормони пред бременоста, за време на бременоста или и двете.
Нарушените тироидни хормони за време на бременоста кај мајките кои имале нарушување на тироидната жлезда пред бременоста може да го зголемат ризикот од аутизам кај детето, објавуваат истражувачите.
Иако соодветно третираните хронични нарушувања на тироидната жлезда не ја зголемуваат веројатноста за дијагноза на аутизам кај децата, постојаните хормонални нерамнотежи во текот на повеќе тримесечја го зголемуваат ризикот, вели раководителот на студијата Идан Менаше од Универзитетот „Бен-Гурион“ во Негев во Израел.
Студијата следела повеќе од 51.000 породувања, вклучувајќи 4.409 случаи во кои мајките имале абнормални нивоа на тироидни хормони пред бременоста, за време на бременоста или и двете, објави Ројтерс .
Доколку постоечката дисфункција на тироидната жлезда била соодветно контролирана, таа не била значајно поврзана со поголем ризик од аутистичен спектар на нарушувања, според извештајот во „ The Journal of Clinical Endocrinology & Metabolism“.
Исто така, дисфункцијата на тироидната жлезда што започнала за време на бременоста не го зголемила ризикот.
Сепак, дисфункцијата на тироидната жлезда присутна и пред и за време на бременоста е поврзана со повеќе од двојно поголем ризик од аутизам, откриле истражувачите.
Ова особено важи за жени со намалена функција на тироидната жлезда и следствено ниски нивоа на тироидни хормони.
Колку подолг е периодот на хипотироидизам, толку е поголем ризикот од аутизам, а веројатноста е повеќе од трикратно зголемена кога нивоата на хормони се ниски во текот на сите три триместар од бременоста.
Премалку жени во студијата имале зголемена функција на тироидната жлезда, па затоа таа група не била анализирана одделно.
Авторите навеле дека мајчините тироидни хормони се клучни за развојот на мозокот на фетусот.
„Овие наоди ја истакнуваат потребата од рутинско следење и навремено прилагодување на терапијата за одржување на нормални нивоа на тироидни хормони за време на бременоста“, рече Менаше.
