Половина од нашето тело го сочинува водата. При дневните активности сите губиме дел од оваа клучна состојка. Истражување кое е објавено во списанието Journal of Cerebral Blood Flow & Metabolism, открило дека и мал недостаток на вода (дехидрација), што изнесува околу 5% од телесната тежина, влијае на крвните садови во мозокот. Тоа предизвикува намалување на интелектуалните и моторните функции на мозокот.
Препорака за одржување на нормална хидрација на организмот е осум чаши вода на ден. Избор може да биде и газираната вода во која има растворено јаглерод диоксид. Освен што е без шеќер, газираната вода има и дополнителни здравствени предности.
Газираната вода хидрира и помага во варењето. Студија објавена во Европското списание за гастроентерологија и хепатологија, покажала дека газираната вода помага при проблеми со жолчката, го олеснува варењето и помага во регулирањето на столицата. Исто така дава чувство на ситост, па затоа се препорачува при намалување на телесната тежина. Студија објавена во списанието Journal of Nutritional Science and Vitaminology покажала дека лицата кои пиеле газирана вода на празен желудник, се чувствувале сити, со што потребата за храна им се намалила за дури 40%. За да избегнете прејадување, испијте две чаши газирана вода 30 минути пред оброкот.
