ПМС симптомите, кои се разликуваат од жена до жена, обично траат до неколку дена пред почетокот на периодот, а секоја дваесетта жена има потешки симптоми, кои и пречат во секојдневниот живот и работа.
Научниците објавија дека ја откриле врската помеѓу ПМС и консумирањето на алкохол, но не успеале да утврдат дали тешкотиите поврзани со предменструалниот синдром ги поттикнуваат жените на консумирање алкохол или обратно.
Проучувањето на податоците од 19 истражувања спроведени во осум земји покажало „умерена врска“ на симптомите на предменструалниот синдром, како што се грчеви, осетливост на дојките, промени во расположението и депресија, од една страна и „посегнување“ по чашката од друга страна.
Ублажување на симптомите
Поврзаноста била поизразена кај поголема количина на алкохол, велат истражувачите. Тоа сугерира дека поверојатно е консумирањето алкохол да биде причина, а не последица на некои случаи на ПМС.
„Но, податоците не можат со сигурност да исклучат дека ПМС ги поттикнува жените да консумираат алкохол со цел да ги ублажат нивните симптоми“, вели лидерот на студијата Бахи Такуче од шпанскиот Универзитет во Сантијаго де Компостела.
„Во секој случај, откритието е „значајно со оглед на тоа што дека распространетоста на консумацијата на алкохол кај жените во светот не е за занемарување“, напиша тимот во магазинот „BMJ Open“.
Податоците користени во оваа студија доаѓаат од САД, Велика Британија, Полска, Швајцарија, Турција, Јужна Кореја, Тајван и Австралија.
Врз основа на добиените податоци и заклучоци од истражувањето, тимот на научници проценил дека секој десетти случај на ПМС во светот може да биде поврзан со консумација на алкохол, или секој петти случај во Европа.
Гинекологот Ник Панеј од Лондон вели дека резултатите не се изненадувачки, со оглед на тоа што алкохолот влијае на хормоните и невротрансмитерите.
