Италијанските и британските лекари ја истражуваат можната врска помеѓу пандемијата со коронавирусот и тешката воспалителна болест со која децата доаѓаат во болница, со висока температура и отечени артерии.
Лекарите во северна Италија, едно од најголемите светски жаришта на КОВИД-19, пријавиле невообичаено голем број на деца помлади од девет години со тешки форми на ретката болест Кавасаки. Слично воочиле и лекарите од Велика Британија, па министерот за здравство Мет Ханкок на вчерашната прес конференција изјави дека е “многу загрижен“ и дека лекарите ова прашање детално го анализираат.
Болеста Кавасаки, чиј причинител е непознат, погаѓа деца под пет години и предизвикува висока температура, осип, отечени лимфни јазли и во тешки случаи и воспаление на срцевите артерии.
Во болницата во Бергамо, минатиот месец биле примени над 20 деcа со тешки васкуларни воспаленија, шест пати повеќе отколку во цела година, изјавил детскиот кардиолог Матео Киуфреда.
Според него, само неколку од нив биле позитивни на коронавирусот и за слични слуачи му јавиле колегите од Мадрид и од Лисабон. Тој ги повикал лекарите да го документираат секој таков случај за да се утврди дали има поврзаност помеѓу болеста Каваски и КОВИД-19.
Вчера и Health Service Journal подели предупредување до сите лекари во Велика Британија во кое ги предупредува на нов синдром кој се почесто се јавува кај децата во последните неколку денови. Според извештајот, децата во Британија се почесто имаат невообичаени симптоми, како силна болка во стомакот.
“Во последните три недели се појави голем раст на бројот на деца на сите возрасти со мултисистемско воспаление кое изискува интензивна нега. Синдромот може да предизвика непријатни симптоми како абдоминална болка и воспаление во срцето“, пишува во предупредувањето.
