Малку е веројатно дека лицата кои се опоравиле од КОВИД-19, може повторно да се заразат во наредните шест месеци по првата инфекција, покажува британска студија спроведена на здравствените работници.
Истражувањето е добра вест за повеќе од 51 милион лица кои се заразени со новиот коронавирус од почетокот на пандемијата, објавија научниците од Универзитетот Оксфорд, автори на ова истражување.
“Ова се навистина добри вести бидејќи можеме да бидеме сигурни дека барем во краток временски рок, повеќето од оние кои се опоравиле од КОВИД-19, нема повторно да се заразат“, вели Дејвид Ејре, професор на Оксфорд и еден од авторите на истражувањето.
Ретките случаи на повторна инфекција создадоа загриженост дека имунитетот може да биде со кратко траење и дека опоравените пациенти можат многу брзо повторно да се инфицираат. Но, резултатите од ова истражување спроведено на здравствени работници изложени на новиот коронавирус, што ги прави високоризична група за зараза, покажуваат дека повторната инфекција е екстремно ретка.
“Инфекцијата со КОВИД-19, поголем процент од луѓето ги штити од повторна зараза најмалку шест месеци“, нагласува проф. Ејре.
“Не пронајдовме нова симптоматска инфекција ниту кај еден од испитаниците кај кои се пронајдени антитела“, додава тој.
Истражувањето траело 30 дена. Во текот на студијата 89 од вкупно 11.052 здравствени работници без антитела добиле коронавирус и симптоми, а тоа не се случило на ниту еден од 1246 лица со антитела.
“Ќе продолжиме внимателно да ја следиме оваа група на работници за да утврдиме колку трае имунитетот и дали претходната инфекција влијае на тежината на болеста ако дојде до повторна зараза“, најави проф. Ејре.
