Самата астма не е ризик фактор за хоспитализација или потешка форма на КОВИД-19, а лицата кај кои астмата е предизивикана од алергии, всушност може да имаат и помал ризик, покажува ново истражување претставено на годишниот виртуелен состанок на Американската академија за алергии, астма и имунологија.
Научниците од Универзитетот Стенфорд следеле 5596 пациенти кои биле позитивни на КОВИД-19 од март до септември 2020.
Од таа бројка болни, 11 проценти биле хоспитализирани, вклучувајќи 100 пациенти со астма. Откакo ги разгледале останатите медицински состојби на пациентите кои се поврзуваат со потешко заболување од КОВИД-19, меѓу кои е високиот крвен притисок, болести на срцето, дијабетес и дебелина, “астмата веќе не била ризик фактор за хоспитализација“, вели д-р Лорен Егерт.
Таа вели дека меѓу пациентите кои биле хоспитализирани, астмата не била значајно поврзана со тежината на болеста.
Научниците исто така откриле дека кај пациентите со алергиска астма речиси на половина е помала веројатноста дека ќе треба да се хоспитализираат во споредба со пациенти со други видови астма.
Можното објаснување, вели Егерт, е тоа дека кај алергиската астма, имуниот сиситем го намалува производството на протеинот АСЕ2 на клеточните површини кои се главна влезна точка за коронавирусот.
