Системот за известување, кој може да се инкорпорира во постоечките капсули за лекови, содржи биоразградлива радиофреквентна антена. По испраќањето сигнал дека апчето е консумирано, повеќето од нејзините компоненти се разградуваат во желудникот, додека малиот радиофреквентен чип поминува низ телото и се исфрла низ дигестивниот тракт, објавија истражувачите во списанието „Nature Communications“.
Тестовите на животински модел покажаа дека RF сигналот бил успешно пренесен од внатрешноста на желудникот во рок од 10 минути по голтањето на апчето и дека можел да биде прочитан од надворешен приемник од растојание од околу 60 сантиметри, објави Ројтерс.
Доколку системот треба да се развие за употреба кај луѓе, истражувачите предвидуваат дизајнирање на нослив уред кој би го примил сигналот и би го пренел до здравствениот тим на пациентот.
Непримањето терапија како што е пропишано е голем проблем и придонесува за стотици илјади смртни случаи што може да се спречат и милијарди долари трошоци за здравствена заштита секоја година, велат истражувачите во соопштението.
Особено, ваквите апчиња би можеле да бидат корисни за следење на пациенти со трансплантација, кои мора да земаат имуносупресивни лекови за да спречат отфрлање на органи, или луѓе со многу заразни болести како што е туберкулозата, кои сега се следат преку редовни посети на клиниката за да се провери дали примаат терапија, велат истражувачите.
„Сакаме да им дадеме приоритет на лековите каде што непочитувањето на упатствата може да има навистина сериозни последици за поединецот“, изјави во соопштението раководителот на студијата, д-р Џовани Траверсо, гастроентеролог во болницата „Бригам енд Женс” и вонреден професор по машински инженеринг на МИТ.
