Иако голем дел од жените се убедени дека не ‘рчат, и тие ‘рчат не само еднакво често, туку и еднакво гласно како и мажите, откриле израелските научници кои испитале околу две илјади пациенти во Центарот за нарушувања на сонот, а резултатите од нивното истражување се објавени во списанието Journal of Clinical Sleep Medicine.
СИМПТОМ НА АПНЕА
“Откривме дека нема разлика во интензитетот на ‘рчењето меѓу половите, но жените имаат тенденција да ја потценат гласноста на нивното ‘рчење. Фактот дека жените мислат дека ‘рчат поретко и потивко е веројатно една од пречките за почесто да се јават во клиниките за нарушувања на спиењето, што е важно затоа што ‘рчењето може да биде и симптом на апнеа“, вели д-р Нимрод Мајмон, професор на Универзитетот Гурион во Израел.
Апнеата е предизвикана од повторувачко затворање на дишните патишта за време на спиењето, што доведува до пад на нивото на кислород и резултира со чести будења. Апнеата е почеста кај лицата со прекумерна телесна тежина и кај луѓето со подебел врат. Останатите симптоми на апнеа вклучуваат будење со сува уста и/или главоболка и изразен замор и раздразливост во текот на денот. Исто така, партнерот на лице со апнеа може да забележи долги паузи помеѓу вдишувањата додека лицето спие, а потоа фаќање воздух или звук налик на гушење кога дишењето продолжува. Благите случаи на апнеа не бараат секогаш лекување, но потешките форми може да бидат опасни бидејќи го зголемуваат ризикот од срцев удар или тешки несреќи до кои може да дојде поради голем замор и поспаност.
