Промените на грлото на матката, кои може да прераснат во рак можеби и не треба да се лекуваат и може да се поправат сами од себе во 50 отсто од случаите, покажа новото британско истражување.
Во рамките на истражувањето, чии резултати беа објавени во „British Medical Journal“, биле следени повеќе од 3 000 жени при што е утврдено дека половина од умерените лезии пронајдени на рутински тестови самите се повлекле.
Авторите на студијата истакнуваат дека и понатаму е особено важно жените да се јавуваат на поканите за тестирање, бидејќи редовното тестирање спасува животи, пренесува „Би-би-си“.
Анализата на тестовите кај повеќето жени покажува нормални непроменети клетки, но кај секој дваесетти тест прикажува некоја форма на промена на грлото на матката. Иако повеќето од тие промени најверојатно нема да доведат до појава на рак и клетките може да се вратат во нормала, некои лезии сепак треба да бидат превентивно отстранети.
Лекарите третираат умерени претканцерогени лезии класифицирани како ЦИН 2, додека оние кои се категоризирани како ЦИН 1 редовно се контролираат.
Категоризацијата ЦИН (цервикална интраепителна неоплазија) означува колку длабоко се забележани клеточните промени во однос на површината на грлото на матката
ЦИН 1 укажува на зафатеност на една третина од епителот на грлото на матката, ЦИН 2 на две третини, а ЦИН 3 (дисплазија од тежок степен) каде промената на клетките на епителот се наоѓа на повеќе од две третини и тоа се смета за предстадиум на рак на грлото на матката.
Истражувањето кое се занимаваше со ЦИН 2 лезии покажа дека повеќе од половина од нелекуваните случаи спонтано се поправиле во рок од две години, а само помалку од една третина не се промениле. Дури секој петти наод се влошил со текот на времето.
Кај жените помлади од 30 години, повеќе од 60 отсто од ЦИН 2 лезии спонтано се поправиле за период од две години, 23 отсто останале непроменети, а 11 отсто се влошиле.
Тоа значи дека на 1 000 жени под 30 години со дијагноза ЦИН 2 – кај 600 жени ќе дојде до спонтана регресија, 230 промени ќе се задржат, а 110 ќе се влошат и би можело да се претворат во рак.
Професорката Меги Крукшанк од Универзитетот во Абердин вели дека дури и малиот ризик од рак (0,5 проценти според оваа студија) за некои е преголем и дека 50 до 60 отсто шанси за регресија и понатаму значат коцкање ако се оди на опцијата следење и одложување на третманот. Но, од друга страна, она што следува по отстранувањето на дел од ткивото на грлото на матката, како што се болки, крвавење, нарушување на менструалниот циклус, отсуство од работа, можностите за компликации во бременоста, вклучувајќи абортус или предвремено породување, исто така, треба да се земат предвид при донесување на одлуката.
