Главоболка и губење на осетот за мирис се најчестите симптоми на болеста КОВИД-19 кај европските пациенти кои имаат блага или умерена форма на болеста, покажуваат резултатите од истражувањето, во кое се истакнува дека болеста се појавува во различни форми, зависно од возраста и полот на заболениот пациент. Седум од десет заболени ги имаат овие два симптома, стои во заклучокот на истражувањето на Институтот IFOS објавено во Journal of Intern Medicine изведено на повеќе од 1400 пациенти.
Останати најчести симптоми се: затнат нос (67,8%) и кашлица (63,2%), замор (63,3%), потоа болки во мускулите (62,5%), течење на нос (60,1%) и губење на сетилот за вкус (54,2%), додека зголемена телесна температура имале помалку од половина од заболените (45,4%).
Ова е прво епидемиолошко истражување на европски пациенти со блага форма на КОВИД-19, покренато за да се процени зачестеноста на симптомите на губење на сетилото за мирис (аносмија) и на сетилото за вкус (агеузија), кои ги споменувале некои пациенти.
Резултатите од истражувањето покажале зачестеност на овие два симптома, кои пак не биле забележани во истражувањата на пациенти во Азија.
Истражувањата во пет европски земји (Франција, Белгија, Италија, Шпанија и Швајцарија) потврдуваат дека губењето на осетот за мирис е еден од најспецифичните симптони на КОВИД-19 и тоа не само како последица на затнат нос.
“Способноста на КОВИД-19 да го нападне олфактивниот центар и средишниот нервен систем е веројатно објаснување за аносмијата“, истакнуваат лекарите.
Аносмијата и агеузијата се многу малку опишани во истражувањата на кинеските пациенти, кои ја наведувале зголемената температура, кашлицата и респираторните тегоби како симптоми на КОВИД-19.
Истражувачите таа разлика ја објаснуваат со фактот дека кинеските истражувања се водени на хоспитализирани пациенти, со потешка форма на заразата. Авторите на ова истражување претпоставуваат дека генетските мутации на коронавирусот би можело да бидат причина за различните симптоми и нагласуваат дека зачестеноста на симптомите зависи од возраста и полот на заболеното лице.
Младите пациенти, нагласуваат лекарите најчесто имаат проблеми со увото, носот и грлото, додека повозрасните добиваат температура, заморни се и го губат апетитот.
Кашлица и висока температура почесто имаат мажите, а жените почесто го губат осетот за мирис, страдаат од главоболка и имаат затнат нос.
