Истражувањето кое го направиле американските научници од Медицинскиот центар на Универзитетот Џорџтаун покажало дека редовната употреба на пробиотици кај доенчињата и во детството значително може да ја намали потребата за давање антибиотици во тој период. Инаку, неселективната и прекумерна употреба на антибиотици е поврзана со зголемената резистентност на антибиотици во многу делови од светот.
Податоците од Американскиот центар за контрола на болести и превенција (CDC) покажуваат дека во САД секоја година се дијагностицираат околу 2 милиони инфекции, резистентни на антибиотици, од кои 23 000 имаат фатален исход.
-
Намалувањето на бројот на препишани рецепти за антибиотици е главен чекор во спречувањето на отпорноста на антибиотици, сметаат научниците.
Ако тоа може да се постигне со едноставен и релативно евтин чекор, како што е редовната употреба на пробиотици, ова би било важен напредок во оваа борба, велат истражувачите, чија студијата е поддржана и од „International Scientific Association for Probiotics and Prebiotics“.
Американската студија ги анализирала резултатите од 12 клинички истражувања во кои биле користени пробиотици кај доенчиња и деца, при што било утврдено дека секојдневната употреба на пробиотици довела до намален број на препишани рецепти за антибиотици за 29 проценти. Овој процент бил зголемен на 53 %, кога биле земени предвид само најквалитетните истражувања
„Ние веќе имаме докази дека консумирањето на пробиотици ја намалува инциденцата и тежината на одредени типови на вообичаени акутни инфекции на респираторниот и гастроинтестиналниот тракт“, изјавил Даниел Меренштајн, еден од истражувачите. „Прашањето е дали ова намалување е цврсто поврзано со опаѓањето на употребата на антибиотици. Гледаме дека постои поврзаност“.
Пробиотиците кои биле употребени во овие студии биле соеви на Lactobacillus и Bifidobacterium.
Потребни се повеќе истражувања за сите возрасти, особено кај повозрасните, велат истражувачите. Студијата е објавена во „European Journal of Public Health“.
