Речиси секое четврто лице можеби нема да добие вакцина против КОВИД-19 барем до 2022., оти богатите земји со помалку од 15 проценти од светската популација резервирале 51 процент од дозите на најперспективните вакцини, објавија истражувачите од Школата за јавно здравство Џон Хопкинс Блумбер во САД.
Тоа би значело дека остатокот од вакцините би морало да ги “делат“ земјите со ниски и средни приходи, во кои живеат над 85 проценти од светскта популација, велат истражувачите, порачувајќи дека ефикасниот одговор на пандемијата бара да земјите со висок доход учествуваат во праведна дистрибуција на вакцината низ светот.
Во истражувањето се наведува и дека од 15 ноември државите со висок приход однапред нарачеле речиси 7,5 милијарди дози вакцини од 13 производители, што ги вклучува Јапонија, Австралија и Канада, кои заедно имаат над една милијарда дози, но чинат помалку од еден процент од моменталните нови случаи на коронавирусот.
Дури и ако вакцините на водечките производители го достигнат максимално предвидениот производствен капацитет, речиси 25 проценти од светската популација нема да добие вакцина уште најмалку една година, при што истражувачите од Џон Хопкинс држат до тоа дека и КОВАКС, како установа на Светската здравствена организација може да има клучна улога во обезбедувањето на фер пристап до одбраните вакцини, иако обезбедила само 500 милиони дози или далеку под целта да испорача најмалку 2 милијарди дози до крајот на 2021.
Глобалниот пакт, започнат во април, има за цел да ги здружи средствата од побогатите земји и непрофитни организации за да го забрза развојот и производството на вакцини против КОВИД-19 и праведно да ги дистрибуира низ целиот свет, но досега е обезбедна само половина од потребните пари, САД и Русија како клучни играчи во развојот и производството на вакцини не се приклучија, се наведува во студијата од Џон Хопкинс.
