За мотивација за движење се потребни три главни работи – мала сума на пари, поставена цел и уред кој би можел сето тоа да го следи. Станува збор за прво истражување кое докажало дека кога вежбањето се комбинира со финансиска мотивација и поставена цел – значајно се подига нивото на физичка активност.
Новото клиничко истражување проучувало како да се мотивираат пациентите со срцеви заболувања или лицата кои страдаат од исхемична срцева болест за конечно да почнат да вежбаат.
Редовното вежбање во повеќе наврати се покажало дека е корисно за пациентите со срцеви болести, бидејќи го намалува ризикот од смрт за дури 30 отсто. Сепак, многумина и понатаму не можат да најдат мотивација.
Научниците следеле 105 лица кои страдаат од горенаведените болести во период од 24 недели. Една група на пациенти носела уред, кој го следел нивното вежбање, имале поставена цел, а првите 16 недели на нивната виртуелна сметка им „легнувале“ по 14 американски долари неделно, односно два долари на ден.
Резултатите биле изненадувачки: оваа група направила дури 1300 чекори повеќе од контролната група, па дури и кога финансиската поддршка секнала, продолжиле да бидат физички активни
Докторот Нил Чокши од Американската асоцијација за срце, во официјалното соопштение за медиумите, објаснил: „Ова е прва студија која докажува дека иако носењето на уредот не е ефикасно, кога се комбинира со финансиска мотивација и поставена цел значително го подигнува нивото на физичка активност.“
Сепак, д-р Сабаро Мајла за „Healthline“ потенцирал дека истражувањето, сепак, било прекратко и дека мора да се земе предвид помошта, мотивацијата и персонализираниот пристап, кои контролната група не ги добила.
