Мала е веројатноста дека лицата вакцинирани против КОВИД-19 ќе починат од оваа болест, освен ако не се многу стари или веќе тепко болни пред инфекцијата, покажуваат резултати од студија спроведена во Италија.
Студија на националниот Здравствен институт (ISS), во рамките на редовниот извештај за починати од КОВИД-19, покажува дека просечната возраст на оние кои починале и покрај тоа што се вакцинирани, е 85 години. Во просек, лицата имале пет постоечки болести.
Просечната возраст на починати, кои не биле вакцинирани, изнесувала 78 години, со веќе постоечки четири состојби.
Меѓу починатите кои биле вакцинирани најголем број биле случаи на пациенти со проблеми со срцето, деменција и рак.
Анализата, спроведена од 1 март до 5 октомври оваа година, ја проучувала медицинската документација на 671 невакцинирано лице, починато од КОВИД-19 и 171 комплетно вакцинирани лица.
Во следениот период во Италија вкупниот број на ковид жртви изнесувал 38.096.
Меѓу нив имало 33.620 невакцинирани, 2130 примиле само една доза или се заразиле кусо по инокулацијата и пред создавањето антитела, а 1440 биле целосно вакцинирани.
Италија во октомври ја постигна целта за целосно вакцинирање на 80 проценти од населението над 12 години, праг што владата го идентификуваше како значајно ниво на безбедност од вирусот.
