Последиците од труење со храна може да бидат мошне непријатни, па дури и опасни, затоа посветете внимание на правилното чување, но и изгледот и мирисот на храната која не се изела во првите два дена, предупредуваат нутриционистите.
Во овој период од годината најчесто јадење се сармите, месото и неизбежната руска салата, потоа питите, чорбите кои треба да го закрепнат организмот. Најотпорна од сите наброени деликатеси е сармата, но и таа има свој рок на траење. Сармата треба да се чува во фрижидер и да се изеде меѓу три и четири дена од приготвувањето. Се препорачува да се подгреваат количества доволни за еден оброк, а не цело количество. Треба добро да се загрее (да проврие) за да се спречи развивањето на микроорганизмите. Замрзната, пак, може да се чува до четири месеци.
Печеното месо, пак, треба да се изеде за три дена. Најподложна на расипување е рибата и не би требало да се јаде после два дена.
Корисни совети: Храната која ви е сомнителна не се обидувајте да ја “спасите” од расипување со подгревање затоа што тоа нема да помогне. Одмрзнатата храна никогаш не ја замрзнувајте повторно.
Инаку, се може да се замрзне, но таа постапка може да влијае на вкусот и на својствата на одделна храна. На пример, сосовите може да ја загубат својата кремаста конзистенција, а зеленчукот да ја загуби бојата. Зелените салати особено не е добро да се замрзнуваат, како ни мајонезот. Посебно внимателни треба да бидат трудниците, затоа што последиците од труење со храна кај нив може да бидат фатални за плодот.
