Предолгото седење може да го зголеми ризикот од мозочен удар, но ако додадете и малку движење, а тоа може да биде и едноставно извршување на домашните работи, лесно можете да го намалите тој ризик, покажуваат резултатите од студијата објавена во списанието JAMA Network Open.
Недостатокот на кислород и хранливи материи предизвикува оштетување и изумирање на нервните клетки, што резултира со оштетување на мозокот и губење на функциите што ги контролира тој дел од мозокот. Мозочниот удар може да биде последица на затнување на артеријата која го снабдува мозокот со крв, што се нарекува исхемичен мозочен удар или мозочен инфаркт, кој е и најчест. Но, може да се појави и поради пукање на крвен сад во мозокот кога доаѓа до излив на крв во мозокот, односно хеморагичен мозочен удар.
Студијата опфатила околу 8.000 возрасни лица кои носеле уред кој бележел колку брзо се движат во текот на неделата. Просечната возраст била 63 години. За време на периодот на следење, кој траел 7 години, 246 учесници во студијата доживеале мозочен удар.
Лицата кои седеле повеќе од 13 часа дневно во текот на првата недела од истражувањето имале до 44 отсто поголеми шанси да добијат мозочен удар за разлика од оние кои во седечка положба поминувале помалку од 11 часа во денот. Исто така, седењето подолго од 17 минути е поврзано со поголем ризик.
Не е изненадувачки што лицата кои вежбале барем 25 минути дневно исто така имаат 43 отсто помал ризик од мозочен удар, но кога се зборува за вежби со многу низок интензитет од 4 до 5 часа неделно, ризикот е помал, но изнесува 26 отсто.
НАЈЧЕСТИТЕ СИМПТОМИ НА МОЗОЧЕН УДАР СЕ ПОЈАВУВААТ ИЗНЕНАДНО
- Ненадејна вкочанетост, слабост или одземеност на раката, ногата или лицето, особено ако е зафатена само едната страна од телото
- Изненадни говорни пречки – отежнато разбирањето, зборувањето или губењето на говорот
- Ненадејни нарушувања на видот – нагло заматување или губење на видот,
- Ненадејни пречки во одењето, несигурност и занесување во одот, губење на рамнотежа, вртоглавица
- Изненадна силна главоболка, може да биде придружена со мачнина и повраќање
РИЗИК ФАКТОРИ ЗА МОЗОЧЕН УДАР
Фактори на ризик на кои можеме да влијаеме (да ги промениме, контролираме и лекуваме): пушење, неправилна исхрана, физичка неактивност, обезност, зголемено консумирање алкохол, висок крвен притисок, покачен холестерол, дијабетес, срцеви заболувања (особено атријална фибрилација), транзиторен исхемичен напад (атака).
Фактори на кои не можеме да влијаеме: возраст, пол, семејна склоност.
