Слепите лица наскоро би можеле да добијат ново помагало. Брајан Мвенда, инженер за електротехника од Кенија, разви помагало кое ќе им помогне на слепите полесно да се снајдат во просторот.
Мвенда долго време ги гледал своите слепи пријатели и сакал да им помогне да се движат побрзо и побезбедно, бидејќи нивното снаоѓање дури и во просторот кој со години го познаваат и понатаму е ограничено.
Тој сакал да им овозможи да користат уред кој ќе биде покорисен од досегашните опомагала и се фокусирал на истражување на нови апарати кои би можеле да функционираат според принципот на светлина или звук. Ја користел аналогијата на лилјаците, кои го користат звукот за да го препознаат обликот на објектот пред нив, и на тој начин се досетил на принципот ехолокација – вратено ехо.
Ехолокација е биолошки сонар кој го користат лилјаците, делфините и други животни
Звукот кој се одбива од предметот, се враќа во форма на ехо и помага да се одреди обликот и големината на објектот од кој е одбиен. И луѓето можат да го користат истиот принцип за снаоѓање во просторот.
Уредот развиен од овој кениски инженер еден ден би можел да го замени белиот стап за движење. Тој го нарече „Шесто чуло“, а користи ултразвучни сензори и вибрира во близина на објект. Колку поблиску е уредот (и лицето) до некој објект, толку посилно вибрира.
Ова помагало може да се користи и како уред за итни случаи – во случај на опасност, едно лице може да го притисне копчето за опасност, а уредот испраќа порака со локацијата на лицето на претходно избраниот контакт.
„Шесто чуло“ е моментално во фаза на тестирање и развивање различни начини на кои би требало да препознава пречки како дупки на патот или поголем камен, за што се потребни покомплексни алгоритми.
Мвенда во моментов работи на 5 прототипа, а планира да произведе 20 уреди на почетокот на следната година.
