Податоците на Светската здравствена организација покажуваат дека над 300 милиони лица патат од депресија и дека таа бројка помеѓу 2005 и 2015 година е зголемена за 18 %. Речиси половина од заболените не поминуваат никаква терапија, а најчесто причина за депресијата е табу тема во општеството. Втора причина е проблемот со дијагностицирање, бидејќи на депресија може да укажуваат и некои знаци кои тешко се препознаваат.
„Овој проблем е почест кај мажите бидејќи кај нив се покажуваат нетипични симптоми на депресија“, потенцира д-р Џон Греден, психијатар од Центарот за депресија на Универзитетот во Мичиген.
Ова се некои изненадувачки знаци кои укажуваат на депресија кај мажите.
Лошо расположение
Секако, на сите ни се случува да имаме лош ден бидејќи ни се истурило кафе или ни пукнала гума и тогаш се чувствуваме лошо. Но проблемот се појавува кога тоа тажно и лошо чувство трае неколку дена по ред, а не може да се објасни зошто.
„Тагата станува сериозна, а во комбинација со чувството на јад, може да предизвика вртоглавица, главоболка, мачнини, губење на апетитот или физичка болка“, објаснува терапевтот Греден.
Тоа чувство на депресија трае подолго од еден ден, а може да потрае со недели и месеци и се е посилно ако не се лекува на време. Депресијата не може да се излекува преку ноќ бидејќи влијае и на други делови на мозокот – на амигдалата, хипокампусот и таламусот – кои играат важна улога во одржување на стабилно расположение контролирајќи ги емоциите, сетилата и помнењето, истакуваат лекарите.
Бес кој доаѓа одеднаш
Кај мажите депресијата отвора ранливост, па поради тоа многумина од нив манифестацијата на депресијата ја сметаат за еден вид на слабост, истакнува д-р Греден.
Затоа, додава тој, мажот станува бесен, фрла работи, вика, а чести се обидува да повреди и други луѓе – емотивно или физички, а сето тоа го прави бидејќи се обидува на тој начин да се „ослободи“ од слабоста. Лутината кај нив се појавува од нигде никаде.
Зависност од алкохол и други опијати
Лекарот Греден објаснува дека 20 до 25 % од мажите кои боледуваат од депресија со тек на времето имаат проблеми со опивањето. Алкохолот накратко го зајакнува преносот на допаминот во мозокот – невротрансмитер кој помага за контрола на чувството за уживање и награда, а е потиснат за време на депресијата. Студиите покажуваат дека мажот болен од депресија може да чувствува дури и физичка болка бидејќи на регулирањето на болката влијаат невротрансмитерите како серотонин кои не работат најдобро за време на депресивниот стадиум. Тогаш лицето може да чувствува болка во зглобовите, во грбот и главоболка.
„Поради тие болки, лицето може да стане психички и физички зависно од разни лекарства против болки или опијати кои пружаат кратко чувство на еуфорија“, истакнува психијатарот.
Чувство на замор
Не можете да заспиете? А следниот дена имате проблеми и тешко одржувате будност?Лекарот коментира дека пореметувањето на циклусот на спиење е еден од најраните симптоми на депресија. Дури ¾ од пациентите кои патат од депресија имаат симптоми на инсомнија.
„Кога наместо сон, размислувате за милион лоши работи, мозокот ве држи будни, а преку ден може да чувствувате слабост и вртоглавица“, објаснува д-р Греден.
Намалено либидо
Иако сексуалните односи во поголемиот број случаи го подобруваат расположението, кај мажите со депресија сепак не е така. Една студија покажала дека 75 % од депресивните пациенти имаат намалено либидо и желба за интимност. Ова е ран и сериозен знак на депресија, особено кај помладите мажи. Но д-р Греден објаснува дека за ова треба да се побара лекарска помош, бидејќи бројни антидепресиви влијаат на либидото кај мажите и може да ја намалат желбата за сексуални односи.
