Не грижете се – не сте сами. Има толку многу луѓе што го прават истото како вас.
Нормално е на човек понекогаш да му падне на ум дека можеби нешто не исклучил и да се врати да провери, но кога тоа ќе прејде во секојдневна рутина, однесување кое постојано се повторува, е тогаш таквото однесување има своја дијагноза.
Доколку имате проблем со постојана потреба од проверка дали сте го исклучиле шпоретот, светлото, пеглата, дали сте ги затвориле прозорите во спалната и слично, ќе ве спаси трик кој е многу едноставен
Со мобилниот телефон фотографирајте го исклучениот, на пример, шпорет или пегла извадена од штекер, па кога ќе ви дојде помислата дека тоа не сте го направиле и желбата да се вратите дома и да спасите можна катастрофа, само погледнете во телефонот.
Ова однесување има свое име и презиме – се работи за опсесивно-компулсивно нарушување, кое може да се манифестира на различни начини, а еден од нив е и постојаната потреба за проверка дали е дома се исклучено, дали е вратата затворена, колата заклучена, светлата изгаснати… Од ова пореметување страдаат два до три проценти од луѓето.
Станува збор всушност за комбинација на опсесии и компулсија. „Опсесии се непријатни мисли, слики, нагони или импулси (ненадејно чувство дека нешто страшно ќе се случи), кои може да предизвикаат тешка анксиозност. Вообичаените опсесии вклучуваат стравови од зараза со нечистотија, бактерии, вируси, итн. Тука се и грижите за незаклучени врати, неисклучен шпорет поради што куќата ќе изгори или во неа ќе провалат… Од друга страна, компулсии се повторувачки однесувања (може да бидат и мисли), нешто што лицето го прави за да се почувствува подобро“, велат психолозите.
