Дали знаете дека јаболкото е толку популарно што дури има и свој светски ден – 20 октомври!? Навидум едноставно, но јаболкото е уникатна комбинација на повеќе од 300 супстанции кои дејствуваат синергистички, што значи дека благотворниот ефект дополнително им се зголемува токму поради нивниот меѓусебен однос.
Меѓу различните витамини кои ги содржи јаболкото најмногу се истакнуваат витаминот Ц и витамините А и Б, а тука се и низа на минерали: калиум, калциум, фосфор, железо, магнезиум, бакар… Најголемата „ѕвезда“ се состојките на јаболкото – фенолите и флавоноидите, моќни антиоксиданти кои ги штитат клетките на телото од оштетување и болест. Најпознати флавоноиди се кверцетин и катехин, кои имаат противвоспалително дејство и го намалуваат ризикот од кардиоваскуларни и белодробни заболувања.
Мевлем за дигестивни нарушувања
Јаболкото е богато со драгоцени природни шеќери и органски киселини кои го прочистуваат организмот, а содржи и танин, кој има антибактериско дејство, како и етерични масла.
Од дамнина јаболкото се користи како мевлем за дигестивни проблеми, благодарение на високата содржина на пектин – растворливо растително влакно кое во цревата ги неутрализира штетните материи и ја штити слузницата, а помага и за намалување на холестеролот во организмот. Поради пектинот јаболката се препорачуваат за ублажување на констипација (затвор), но, исто така, помагаат и против „спротивните“ проблеми со столицата – изрендано јаболко е традиционален домашен лек против дијареја.
Најголема концентрација на пектин и антиоксиданти има во кората на јаболкото, па затоа би требало да се јаде неизлупена, но притоа да се внимава јаболкото да има органско потекло
Внимавајте зашто конвенционално одгледување на јаболка обично содржи остатоци од пестициди и често се премачкува со восок за подолго да трае, па пред јадење треба добро да се измие во топла вода. Ако е можно, набавете домашни јаболка што не се хемиски третирани, а ако најдете црви во јаболкото, тоа е (добар) знак дека не е прскано.
Популарна е изреката дека едно јаболко на ден го тера докторот надвор од куќата, а истражувањата покажуваат дека е најдобро да се јадат две јаболка дневно. Наутро на празен стомак и добро изџвакано, јаболкото го стимулира излачувањето на соковите. Навечер, ако го јадеме полека, опушта и успива.
Супер додаток за различни јадења
Суперхранливо, а нискокалорично и освежувачко, јаболкото е идеална ужина и додаток на салати (на пример, со ореви, суво грозје и мед), па се до пикантни јадења, со сирење, месо и зеленчук. Исушената кора и парчиња јаболка може да се додадат во чаеви.
Јаболкото во кулинарството се користи на различни начини, од традиционалните преработки во џем, компот, сок и јаболков оцет, до „трикови“ за пофини јадења, на пример, ако печете месо со исечени парчиња јаболко тоа ќе биде повкусно, посочно и полесно за варење.
