Oстеоартритис е заболување при кое доаѓа до оштетување и трошење на ’рскавицата на коленото, кое главно ги погодува постарите луѓе. Во моментов не постои специјална програма за лекување на остеоартритис, освен терапија против болки или потполно заменување на зглоб. За да си помогнете, одржувајте ја вашата телесна тежина во нормала, вежбајте и хранете се здраво. Единствено така ќе одбегнете операција и долготрајно лекување во иднина.
Најважните фактори кои влијаат на појавата на остеоартритис се дебелината и стареењето. Дебелината може да предизвика брзо влошување на ‘рскавицата во коленото, што доведува до појава на остеоартритис. Иако остеоартритисот е болест што бавно се развива, забележано е дека некои пациенти го развиваат овој процес многу побрзо.
Сега британските истражувачи имаат совет што треба да јадеме за да се заштитиме од оваа хронична болест, а одговорот е брокула! Имено, за време на процесот на варење брокулата создава високо реактивен сулфорафан, супстанца која се смета дека стимулира синтеза на протеините кои ги штитат клетките и ги чуваат од рак, но во исто време и го забавуваат трошењето на ‘рскавицата на зглобовите поврзано со остеоартритис.
„Резултатите од ова истражување многу ветуваат. Ние покажавме дека делува во три лабораториски модели, во клетките на ‘рскавицата кај глувците. Сега сакаме да покажеме дека делува и кај луѓето, не само за да ги излекуваме лицата кои веќе боледуваат од остеоартритис, туку и да им укажеме на здравите луѓе како можат да ги заштитат своите зглобови во иднина“, вели професорот Ијан Кларк, шеф на истражувањето.
