Според истражување на Американското национално здружение за слатки, спроведено над 5 000 лица, луѓето кои секојдневно се засладуваат со бисквити, чоколадо или десерт, немаат поголем ризик од срцеви заболувања, дијабетес или дебелина во споредба со оние кои се ќе се почестат само еднаш неделно. Научниците велат дека не откриле никаква врска помеѓу редовното консумирање слатки и лошата здравствена состојба, пренесува Дејли меил.
„Индексот на тежина не е поврзан со тоа колку често некој јаде благо, туку со вкупниот внес на калории во текот на денот. Умереноста е, секако, круцијална и постои разлика меѓу оние кои секој ден јадат мало чоколадо и оние кои јадат големо чоколадо“, тврди нутриционистката Мери Марфи и додава дека не постои врска помеѓу секојдневното консумирање слатки и високото ниво на холестерол.
Истражувањето покажало и дека повеќето луѓе се гурмани и само околу 4 отсто од нив не го сакаат вкусот на чоколадо и сличните слатки.
Според податоците од американскиот институт, слатките сочинуваат само околу 2 % од вкупниот внес на калории, т.е. околу 44 калории на ден. Споредено со нив, заситените маснотии, брзата храна и соковите се многу поштетни за здравјето и дебелината, тврдат нутриционистите.
