Не само што има неверојатен мирис, јоргованот од дамнина е познат и како мошне лековите билка. Во народната медицина се користат цветот, листот, кората и семето. На пример, листовите помагаат при треска, болести на усната шуплина, лошо варење, проблеми со дишните патишта, покачена температура, висок притисок, камен во бубрегот…
Цветовите од јоргован се одлични за лекување кожни болести и опоравување на кожата. На пример, помагаат при осип, изгореници, акни и сл. Исто така, го олеснуваат кашлањето, бронхитисот, надуеноста, проблемите со очите (при глауком), ги ублажуваат болките при реума…
При треска или проблеми со варењето се пие чај направен од суви цветови. Екстрактот од јоргован се употребува и во козметичката индустрија за нега на чувствителна кожа и отстранување црвенило.
За кората се вели дека се лупи од дрвото во рана пролет или наесен по созревање на плодовите. Се иситнува и добро се суши. Се употребува како чај. Во филџан се става лажичка кора и вода, па се остава да отстои два часа. После тоа се вари и се остава поклопена уште еден час. Се пие филџан до два на ден.
Масло за реума
Потребно: рака суви цветови јоргован, литар маслиново масло
Начин на приготвување: Цветовите ставете ги во голема тегла, сипете го маслото и добро затворете. Држете на сончево место 15 дена. Повремето протресете. Потоа процедете го и сипете го во темен стаклен сад.
Со ова масло масирајте ги болните места три пати на ден. Маслото чувајте го на темно место. Ефектот ќе биде подобар ако со масажата пиете чај од ѓумбир.
Ги брка лошите духови и симболизира љубов
Од дамнешни времиња цветовите јоргован се користеле за чистење на домовите од зли духови, за заштита од уроци, благослов, повикување позитивна енергија. Јоргованот е симбол за радост и живот.
Виолетовиот јоргован ја симболизира вистинската љубов, а белиот младешката невиност. Според една легенда виолетовиот јоргован станал бел откако некој го оставил на гробот на млада девојка која си го одзела животот заради љубов.
