Научниците веруваат дека долготрајната изложеност на стрес може да се манифестира со насобирање на стресот во одредени делови на телото и понекогаш поради тоа да мислиме дека нешто не е во ред со нашето здравје, а причината е всушнот психичка.
Врат и рамена. Стресот доведува до тензија и притисок во вратот и рамената. Кога сме под стрес несвесно ги подигаме рамената и во оваа положба се стегаат мускулите на вратот и рамената поради што подоцна се чувствува болка во тие делови на телото.
Глава. Не е реткост луѓето да имаат главоболка или мигрена поради стресот. Тоа е резултат на отпуштање на одредени хемикалии во телото кога сме под стрес. Тие хемикалии влијаат на нервите и крвните садови во мозокот предизвикувајќи главоболка.
Стомакот многу брзо реагира на нашата ментална состојба. Стресот може да влијае не само на тоа колку ефикасно работат цревата, туку како што тврдат научниците, влијае и на микробите во стомакот. Стресот може да доведе и до лачење на поголема количина на желудочна киселина поради што се јавува жиговина.
Долен дел на грбот. Научниците веруваат дека причината за болката во грбот често е во нашата глава. Кога сме под стрес ја менуваме својата рутина, однесување, начин на одење, навики во спиењето, положба на седењето, а сето тоа може да влијае на мускулите кои го опкружуваат рбетот. Кога тие мускули се стегаат, можно е да се почувствува болка во долниот дел на грбот.
Вилица. Чкрипењето со заби за време на спиење во најголем процент е резултат на стресот. Главниот мускул во вилицата се стега кога лицето е под стрес поради што вилицата се движи лево-десно, а краен резултат е чкрипење со забите.
Кожа. Кога во телото се ослободуваат хормони на стресот, кожата станува многу чувствителна. Овие хормони, исто така ги активираат жлездите на кожата кои почнуваат да произведуваат повеќе масти, ги блокираат порите и резултираат со појава на акни, мозолчиња и други кожни проблеми.
Панкреас. По хроничниот стрес телото може да сигнализира организмот да произведува повеќе инсулин, отколку што всушност е потребно. Тоа може да доведе до оштетување на артериите, дебелеење, а го зголемува и ризикот од дијабетес.
Зглобови, коски и мускули. Болки во зглобовите, коските и мускулите може да бидат поврзани со стресот. Студии покажале дека постои врска меѓу симптомите на депресија и болки во целото тело со стресот.
Срце. Стресот што се доживува при емотивна повреда влијае на срцето и го зголемува крвниот притисок. Долготрајната изложеност на стрес може да го промени ритамот на срцето до таа мера да стане потенцијална опасност од срцев удар.
Имун систем. Имунитетот му помага на телото да се избори со вирусите и бактериите. Кога лицето е под стрес, во телото се ослободуваат хемикалии кои го притискаат имуниот систем, опаѓа нивото на лимфоцити во крвта и телото станува помалку отпорно на болести. Кога организмот е под стрес шансите за разболување се поголеми.
