Иако кафето има некои свои позитивни ефекти за здравјето, а во некои случаи дури и се препорачува за консумација, тоа може и да му наштети на организмот. Ваквото тврдење, произлегува од најновата британска студија според која, овој горчлив напиток го блокира дејството на хранливите состојки со витамини.
Во денешниот нездрав начин на живот, многу луѓе се потпираат на синтетички витамини и минерали, за да ги обезбедат потребните витални хранливи материи. Но, проблемот, тврдат истражувачите, е ако таквите додатоци се пијат пред или по консумирањето кафе, бидејќи нивната ефикасност едноставно се губи.
Причината, додаваат тие, не е во состојките на кафето, туку во тоа дека се пие жешко.
Според истражувањето, топлината драстично го намалува ефектот на додатоците и дури ги уништува полезните бактерии во пробиотската храна, како на пример киселото млеко. Таков ефект се јавува и при консумирање чај, но тој пак носи други благодати за здравјето.
Во извештајот на тимот истражувачи од Универзитетот на Источна Англија, се вели дека топлите напитоци и храни, како овесната каша ја инхибираат апсорпцијата на железото за дури 73% и воопшто не стига во организмот. Околу 46% од Британците внесуваат додатоци на исхраната, а 70% од нив ги внесуваат за време на појадокот.
Новите совети на експертите за внесување на витамини и минерали, се дека тие треба да се пијат најмалку еден час пред или по консумирањето топла храна или пијалаци. Тие нагласуваат и дека сите видови лекови пак е најдобро да се внесуваат со појадокот, бидејќи наутро дигестивниот тракт е поактивен.
