Доколку кафето е ваш омилен пијалак, но и слатките – неодамнешното откритие нуди можно објаснување зошто е така. Имено, научниците откриле дека кофеинот ја намалува нашата способност да забележиме колку всушност некое јадење или пијалак се слатки. Заради ова научниците нагласуваат да бидеме внимателни што и колку јадеме со кафето или после него, бидејќи овој напиток може да ја зголеми потребата за слатка храна.
Во истражувањето, кое за цел имало да открие како кофеинот влијае на забележување на сладината, учествувале 107 возрасни лица. Половина од учесниците пиеле филџан кафе што содржел 200 мг кофеин, додека другата половина пиеле кафе без кофеин (со кинин, за напитокот да биде подеднакво горчлив како и кафе со кофеин). Напитоците биле зашеќерени, а самите испитаници не знаеле дали пијат кафе со или без кофеин.
Учесниците кои пиеле регуларно кафе го оцениле како помалку слатко, за разлика од личностите од другата група. Исто така, после кафето (со или без кофеин), сите учесници пиеле шеќерен раствор, кој, повторно, учесниците од кофеинската група го оцениле како помалку сладок. Авторите на студијата објасниле дека кофеинот ги блокира аденозинските рецептори во мозокот и дека на тој начин ја намалува способноста за забележување на сладината на храната и пијалаците, и како резултат на овој ефект може да се зголеми желбата за благо.
Значи, ако се обидувате да јадете помалку слатки, секако, би требало да посветите внимание на дневниот внес на кофеин и по можност да го ограничите внесот на кофеински напитоци.
