Кафето може да се покаже многу важно во борбата со вишокот килограми, пренесува Дејли мејл. Така е затоа што содржи кофеин кој помага во согорувањето на калориите, а воедно го зголемува и ослободувањето на хормонот окситоцин, кој го регулира апетитот и метаболизмот и ја олеснува борбата со килограмите.
Според истражувањето на група кинески научници направено врз глувци се покажало дека кофеинот го потиснува апетитот и ги стимулира да се поактивни и да трчаат повеќе. Користените дози сепак биле многу високи – 60 мг/кг (еднакви на од 24 до 36 филџани кафе). Се покажало дека кофеинот ги блокира аденозинските рецептори во хипоталамусот – централниот регулатор на енергетскиот баланс кај цицачите. Кај глувците тоа води до ослободување на окситоцин, кој ја намалува дебелината.
Научниците кои биле дел од ова истражување се надеваат дека откритието ќе им послужи за создавање на таблета за слабеење направена врз база на кофеин.
Одамна е познато дека кофеинот помага за слабеење. Механизмот со кој тој делува сепак беше непознат. Се смета дека кофеинот ја зголемува дневната потрошувачка на енергија за 5 проценти.
