Губењето на помнењето е чест симптом по мозочен удар, но за некои пациенти постои надеж дека тие сеќавања може да се вратат. Имено, нова студија од Норвешка испитала 86 пациенти со релативно благи мозочни удари и открила дека на многу пациенти им се подобрило менталното функционирање по 12 недели.
Се покажало дека околу половина од пациентите кои преживеале мозочен удар имале различни форми на оштетувања на помнење една недела по мозочниот удар. Но, три месеци по мозочниот удар, една третина од пациентите со нарушено помнење имале подобрување на функцијата на меморијата.
Инаку, сега повеќе пациенти со мозочен удар преживуваат отколку во минатото, но мозочниот удар останува сериозна и потенцијално фатална состојба. По мозочен удар, преживеаните може да доживеат анксиозност, депресија и замор, заедно со губење на помнењето и намалена способност за учење.
Треба да се истакне дека подобрувањето на помнењето е вообичаено по мозочен удар, но постојат големи индивидуални разлики. Имено, некои луѓе кои преживеале мозочен удар сè уште имаат пореметување на меморијата и мора да научат да живеат со него. Доброто следење и поддршката од пријателите и семејството се важни во процесот на опоравување на пациентите кои доживеале мозочен удар, потенцираат експертите.
