Жените во постменопауза кои имаат недостаток на витамин Д се изложени на поголем ризик од развој на метаболички синдром отколку жените со соодветно ниво на витамин Д. Инаку, нивото на 25-хидроксивитамин Д под 20 нг/мл, исто така, е поврзано со зголемен ризик од зголемено ниво на триглицериди и низок HDL.
Се смета дека одржувањето на соодветно ниво на 25-хидроксивитамин Д кај жените во постменопауза може да го намали ризикот од развој на метаболички синдром, состојба која е поврзана со кардиоваскуларни компликации и поголема смртност.
Треба да се спомене дека нивоата на 25-хидроксивитамин Д од 30 нг/мл и повеќе, се сметаат за задоволителни.
За да се постави дијагноза на метаболички синдром треба да бидат присутни најмалку три од пет фактори: обем на половина поголем од 88 см, ниво на триглицериди од најмалку 150 мг/дл, HDL ниво под 50 мг/д, крвен притисок од најмалку 130/85 и ниво на гликоза од најмалку 100 мг/дл.
Витаминот Д влијае и на излачувањето на хормонот инсулин и на неговата чувствителност, а се знае дека има важна улога во развојот на метаболички синдром, пренесува „Maturitas“.
