Пецкање во грлото, главоболка, лесно течење на нос – какви се симптомите на КОВИД-19?
Пред една година такви болести или лесна настинка не би не интересирале – ако воопшто и сме ги забележувале. Но, сега во есен 2020. година, тоа изгледа сосема поинаку. Доволно е само да се кивне за да почне да се размислува: “Каде бев последниве денови, колку се доближував до луѓето, што допирав? Функционираат ли моите сетила за мирис и вкус? Помалку и тешко дишам…“
СТОП! Ако тоа нешто ви значи, не сте единствени.
Научниците и лекарите исто така постојано се преокупирани со такви мисли и се уште се обидуваат да влезат во трага на бројните симптоми кои може да се јават кај едно лице инфицирано со новиот коронавирус. Научниците од Медицинскиот факултет во Виена сега можат да внесат барем малку ред во долгиот список на знаците за инфекција со SARS-CoV-2. Тие утврдиле седум различни форми со благи симптоми во текот на оваа болест. Студијата е објавена во списанието Allergy.
Нивната примарна цел е да била да откријат како изгледа добар имунитет по оздравувањето и на која основа тој може да се измери. Поради тоа, имунологот Винфрид Пикл, алергологот Рудолф Валент и нивните колеги испитале 109 реконвалесценти – односно лица кои се опоравиле од КОВИД-19 и испитале и 98 здрави лица од контролна група и направиле анализи на нивната крв.
СЕДУМ ГРУПИ НА СИМПТОМИ НА КОВИД-19
На основа на тие податоци, научниците успеале да покажат дека различните симптоми се поврзани и дека се јавуваат во т.н. групи на симптоми. Тие ги идентификувале следниве седум групи:
- Симптоми слични на грип (температура, треска, замор и кашлица)
- Симптоми на настинка (течење на нод, кивање, суво грло и затнат нос)
- Болки во зглобовите и мускулите
- Воспаление на очите и слузокожата
- Проблеми со белите дробови (воспаление на белите дробови и отежнато дишење)
- Гастроинтестинални проблеми (вклучувајќи пролив, мачнина и повраќање)
- Губење на осетот за мирис и вкус и други симптоми
“Во последната група можевме да утврдиме дека повеќе лица со млад имун систем се погодени со губење на осетот за мирис и вкус“, вели главниот автор на студијата и имунолог Винфрид Пикл. Младиот имун систем не се мери со возраста на пациентот, туку со бројот на имуни клетки кои неодамна мигрирале од тимусот (Т-лимфоцити).
Според научниците, може да дојде и до преклопување помеѓу групите симптоми. Но, се покажале врски помеѓу различните групи и специфичните имунолошки параметри. На пример, текот на болеста проследен со висока температура во корелација со имунолошкото помнење на телото може да укажува на релативно долг имунитет. Губењето на мирисот и вкусот, од друга страна, е поврзан со повисоко ниво на Т-лимфоцити.
КОВИД-19: ОТИСОК ОД ПРСТ ВО КРВТА
На основа на анализите на крв, научниците успеале да индетификуваат некои важни маркери на КОВИД-19. Откриле дека болеста по 10 недели остава значајни промени во имуниот систем – како отисок од прст во крвта на пациентот.
Бројот на гранулоцити, кои инаку се одговорни за борба против бактериски патогени во имуниот систем, бил многу понизок од вообичаено во групата на КОВИД-19. Тоа, велат научниците, беше изненадувачки и нешто сосема ново.
“Поради тоа, имуните клетки CD4 и CD8 развиваат помнење, а CD8 T-клетките остануваат силно активирани. Тоа покажува дека имуниот систем се уште интензивно се носи со болеста и по повеќе недели по првата инфекција“, истакнува Пикл.
Тоа би можела да биде причината зошто многу пациенти по инфекцијата со КОВИД-19 долго чувствуваат слабост. Истовремено, регулаторните Т-клетки биле значајно намалени, а тоа е, како што вели проф. Пикл, опасна мешавина која би можела да доведе и до автоимуно заболување.
“Покрај тоа, во крвта на реконвалесцентите можело да се докаже и зголемување на имуните клетки кои произведуваат антитела. Колку повисока била телесната температура кај пациентот со поблага форма на болеста, толку поизразен бил имунитетот на вирусот.
