Желудникот не поднесува стрес, алкохол преобилни и пресолени оброци и индустриска храна, оти го отежнуваат неговото функционирање и предизвикуваат тегоби. Затоа, пред се, потребно е да се елиминираат овие фактори и да се променат навиките во исхраната, а ако од време на време си дадете оддишка и се препуштите на хедонизмот, применете ги овие практични совети кои ќе ги решат дигестивните проблеми.
Ублажете ги последиците на стрес
Кога и да сте во можност, одвојте време за себе и минете го во пријатно опкружување, прошетка, читање и разговор со драги личности. Ќе ви помогнат и чаеви и тинктури од лаванда, босилек, маточина, нане, валеријана и кантарион, кои имаат смирувачко дејство.
Одморете го желудникот
Ако почувствувате дигестивни проблеми, прекинете го внесот на храна и дозволете му на желудникот малку да се одмори. Потрудете се да издржите барем четири-пет часа без јадење. За тоа време консумирајте чаеви за олеснување на тегобите и задолжително пијте ги во мали голтки.
Масирајте го стомакот
Со нежни кружни движења во насока на стрелките на часовникот, масирајте го стомакот пет минути. Така ќе го активирате и забрзате движењето на храната низ дигестивниот систем и ќе си ги олесните проблемите со варењето.
Топли облоги
Загревањето на стомакот со шише топла вода или термофор, е проверен лек за ублажување на желудочните тегоби. Се препорачуваат и облоги од камилица, кои се подготвуваат на следниот начин: Сварете посилен чај, оставете го да се олади малку, натопете пешкир со него и ставете го на стомакот додека не се олади целосно. Повторете ја постапката додека не почувствувате олеснување.
Ефикасни мешавини
Коријандерот содржи етерично масло кое помага при создавање на желудочните сокови и ги смирува грчевите во стомакот, кимот поттикнува ослободување од гасови, босилекот одржува рамнотежа во цревната флора, а нането го опушта желудникот и цревата, ја намалува мачнината и грчевите,а стимулира и продукција на желудочни сокови. Може да пиете чај од овие билки или да ги консумирате свежи или сушени.
