Пеницилинот се користи за лекување на бактериски инфекции, вклучувајќи воспаление на белите дробови, грозницаа од шарлах и инфекција на уши. Но, и покрај широката примена, многу луѓе веруваат дека се алергични на пеницилин. Од Американската академија за алергиска астма и имунологија тврдат дека еден од десет пациенти веруваат дека имаат алергија на пеницилин.
Симптомите на алергија на пеницилин најчесто се јавуваат околу еден час по земање на лекот. Стручњаците велат дека луѓето често нуспојавите ги мешаат со алергиската реакција.
При благата алергиска реакција може да се јави исип на кожата, пликови, чешање, течење од нос, кратов здив, а може да се јави солзење на очите. Во ретки случаи, лицето кое е алергично на пеницилин може да доживее анафилакса. Станува збор за силна алергиска реакција до која доаѓа многу брзо по земање на лекот.
„Целото тело е погодено, често реакцијата се јавува неколку минути по изложеноста на причината, т.е. алергенот, а понекогаш се јавува и по неколку часа“, објаснуваат стручњаците.
Симптомите на силна алергиска реакција може да бидат оток во грлото или во устата, промени во брзината на работата на срцето, абдоминална болка и губење на свеста. Доколку лицето доживее анафилакса, потребна е итна медицинска помош.
Иако еден од десет пациенти веруваат дека имаат алергија на пеницилин, од Академијата велат дека повеќето пациенти, односно над 90% од нив, не се навистина алергични на овој лек.
