Воспалението на простата е честа болест која барем еднаш во животот погодува 10-15 % од мажите. Симптомите и во најблагата форма се непријатни, а вообичаено се јавува силна болка.
Простата е жлезда која е дел од машкиот полов систем. Сместена е под мочниот меур, а пред ректумот, завршниот дел на дебелото црево. Изградена е главно од мускулно и жлездено ткиво, а главната функција и е производство на течност која е составен дел од семената течност.
Постојат многу потенцијални причини за воспаление на простата, а некогаш повеќе фактори се одговорни за појава на оваа состојба. Најчести причини се: бактериски инфекции, автоимуна болест, невромускулни или механички повреди.
Ретки причинители може да бидат: пореметување на метаболизмот на уринарната киселина (гихт), камен во простата, стеснување на уринарната цевка, тумори, бенигна хиперплазија на простата, алергија на храна, габична инфекција или инфекција со вируси.
Симптомите на воспаление на простата не се специфични исклучиво за оваа болест, па може да наликуваат на симптоми на други заболувања на генитоуринарниот тракт. Симптоми понекогаш може и воопшто да нема, а понекогаш се толку изразени и нагли, да пациентите често бараат интервенција на итна помош.
Акутно воспаление: симптомите настануваат нагло. Може да се јави болка во делот под и зад половиот орган, болка во долниот дел од стомакот и грбот, отежнато мокрење, зачестено мокрење на мала количина урина, зачестено мокрење навечер, гноен или крвав исцедок, замор, зголемена телесна температура. Доколку постои оток на простатата може да го попречува истекувањето на урина, па доаѓа до застој и насобирање на урина во мочниот меур. Простата речиси секогаш при ваква состојба е зголемена.
Хронично воспаление: станува збор за долготраен тек на инфекцијата која трае подолго од три недели. Хроничната инфекција може да се развие од акутната или болеста од самиот почеток има хроничен тек. Кај оваа форма се јавуваат умерени болки под и зад половиот орган, во долниот дел од грбот, благо пореметување во мокрењето во форма на отежнато уринирање на мала количина, оскудно крвав или гноен исцедок. Може да се јави и замор, пецакње, болна ејакулација, па дури и импотенција. Простата може да биде зголемена или намалена и тврда. Не е реткост при оваа состојба единствен симптом да биде повторување на инфекција на мочниот меур.
